ইউৰোপ মহাদেশত মহৰ পৰা জন্ম হোৱা চিকুনগুনিয়া ৰোগৰ বিৰুদ্ধে প্ৰথমটো ভেকচিনৰ অনুমোদন দিছে ইউৰোপৰ ঔষধ নিৰীক্ষণকাৰী সংস্থা ইউৰোপীয় মেডিচিন এজেন্সীয়ে। ইয়াৰ লগতে সংস্থাটোৱে সকীয়াই দিছে যে ‘জলবায়ু পৰিৱৰ্তনে এই ৰোগৰ সংক্ৰমণ বৃদ্ধি কৰিব পাৰে’।
ইউৰোপীয় মেডিচিন এজেন্সীয়ে শুকুৰবাৰে এই ভেকচিনৰ অনুমোদন জনায়।
চিকুনগুনিয়াক চিক জ্বৰ বুলিও কোৱা হয়। ই ডেংগু বা জিকাৰ দৰেই এটা ৰোগ। এই ৰোগৰ ফলত অধিক জ্বৰ আৰু গাঁঠিৰ তীব্ৰ বিষ হয় যিয়ে প্ৰায়ে শৰীৰ দুৰ্বল কৰি তোলে আৰু সময়ৰ লগে লগে পৰিৱৰ্তন ঘটে।
ইউৰোপীয় মেডিচিন এজেন্সী (ই এম এ)ৰ মতে, গাঁঠি ফুলা, পেশীৰ বিষ, মূৰৰ বিষ, বমি, ভাগৰ আৰু ফোহা আদি ইয়াৰ লক্ষণসমূহৰ অন্যতম।
ইউৰোপীয় কমিছনে ভেকচিন ব্যৱহাৰৰ অনুমোদন দিয়াৰ পূৰ্বে ই এম এয়ে চূড়ান্ত পদক্ষেপ হিচাপে বিপণন অনুমোদন দিছে।
ভলনেভা অষ্ট্ৰিয়াই নিৰ্মাণ কৰা ইক্সচিক নামৰ ভেকচিনটোৰ এক ডোজ পাউদাৰ বা বেজীয়ে ১৮ বছৰৰ ওপৰৰ লোকক প্ৰয়োগ কৰাৰ ২৮ দিনৰ পিছত সফল এন্টিব’ডি উৎপন্ন কৰিব। টিকাকৰণৰ পিছত ছমাহলৈকে ইয়াৰ ৰোগ প্ৰতিৰোধ ক্ষমতা থাকে।
ই এম এৰ তথ্য অনুসৰি চিকভি ভাইৰাছৰ দ্বাৰা এই ৰোগৰ সৃষ্টি হোৱাৰ বাবেই এই ৰোগৰ এই নামকৰণ কৰা হৈছে। এই ৰোগত বেছিভাগ গ্রীষ্মমণ্ডলীয় আৰু উপমণ্ডলীয় অঞ্চলৰ লোক আক্রান্ত হয় আৰু মধ্য আৰু দক্ষিণ আমেৰিকাৰ বেছিভাগ দেশতে এই ৰোগৰ হাৰ অধিক হোৱা বুলি জানিব পৰা যায়।
আমষ্টাৰডামস্থিত সংস্থাটোৱে লগতে কয় যে ইউৰোপত চিকুনগুনিয়া কোনো স্থানীয় ৰোগ নহয়, আৰু বেছিভাগ লোকেই মহাদেশখনৰ বাহিৰলৈ যাত্ৰা কৰাৰ সময়ত এই ৰোগত আক্ৰান্ত হয়। সংস্থাটোৱে সকীয়াই দিছে যে মূলতঃ ইউৰোপৰ দক্ষিণ অংশলৈ সংক্ৰমিত ভ্ৰমণকাৰীসকল ঘূৰি অহাৰ পিছত তেওঁলোকৰ দ্বাৰা সংক্ৰমিত হোৱাৰ বিক্ষিপ্ত ঘটনা ঘটিছে।
