বোকাখাতত অতুল বৰাৰ বিৰুদ্ধে কংগ্ৰেছ সমৰ্থিত প্ৰাৰ্থী হ’ব প্ৰাক্তন বিধায়ক জিতেন গগৈ!

৯৩ নং বোকাখাত বিধান সভা সমষ্টিত জীতেন গগৈ হ’ব কংগ্ৰেছৰ মহাজোঁটৰ কংগ্ৰেছ সমৰ্থিত নিৰ্দলীয় প্ৰাৰ্থী৷ এই ঘোষণা বোকাখাতৰ প্ৰাক্তন বিধায়ক জীতেন গগৈৰ৷

সাংসদ গৌৰৱ গগৈৰ লগত বৃহস্পতিবাৰে নিশা বোকাখাতৰ নিজা বাসগৃহত ৰুদ্ধদ্বাৰ বৈঠক মিলিত হৈছিল জিতেন গগৈ৷এই আলোচনাৰ পিছতেই জীতেন গগৈয়ে আজি বোকাখাত নিৰ্মাণ গোটৰ মুখ্য কাৰ্যালয়ত এক সংবাদমেল আয়োজন কৰে৷

সংবাদমেলত জিতেন গগৈয়ে গগৈয়ে আগন্তুক বিধান সভা নিৰ্বাচনত কংগ্ৰেছ সমৰ্থিত প্ৰাৰ্থী হিচাবে বোকাখাত সমষ্টিত প্ৰতিদ্বন্দিতা কৰাৰ কথা ঘোষণা কৰে৷

এই সম্পৰ্কত কংগ্ৰেছৰ দলৰ পৰা তেওঁলৈ এই প্ৰস্তাৱ অহাৰ কথাও সংবাদ মেলত তেওঁ ঘোষণা কৰে৷

অৱশ্যে অসম প্ৰদেশ কংগ্ৰেছ আৰু নিখিল ভাৰত কংগ্ৰেছ কমিতিৰ পৰা অনুমোদনৰ লাভৰ পাছতহে এয়া নিশ্চিত হ’ব বুলিও জিতেন গগৈয়ে মন্তব্য কৰে৷

সংবাদ মেলত জিতেন গগৈয়ে নিজৰ সমষ্টিবাসীক নিজৰ হাইকামাণ্ড আখ্যা দি নিজকে সৰু পুখুৰীৰ ডাঙৰ মাছ বুলি মন্তব্য কৰে৷ বোকাখাত সমষ্টিৰ পৰা নিৰ্বাচিত হ’লে আৰু ৰাজ্যত কংগ্ৰেছৰ নেতৃত্বত চৰকাৰ গঠন হ’লে জিতেন গগৈয়ে মন্ত্ৰীত্ব ল’ব নেকি বুলি সাংবাদিকে সোধা প্ৰশ্নক একেষাৰেই নস্যাৎ কৰে জিতেন গগৈয়ে৷

আজিৰ এই সংবাদ মেলত বিজেপি নহয় অগপৰ সভাপতি অতুল বৰাহে তেওঁৰ মূল শত্ৰু বুলিও ঘোষণা কৰে৷ ২০২১ৰ নিৰ্বাচনেই তেওঁৰ শেষ নিৰ্বাচন হ’ব বুলিও ঘোষণা কৰে জীতেন গগৈয়ে৷

ইফালে সংবাদমেল চলি থাকোতে বোকাখাতৰ প্ৰাক্তন কংগ্ৰেছী বিধায়ক তথা সংসদীয় সচিব অৰুণ ফুকন আহি বোকাখাত নিৰ্মাণ গোটৰ কাৰ্যালয়ত প্ৰৱেশ কৰি জিতেন গগৈৰ লগত ৰুদ্ধদ্বাৰ বৈঠকত মিলিত হয়৷

কংগ্ৰেছৰ দলৰ সৈতে জিতেন গগৈৰ এনে ৰুদ্ধদ্বাৰ বৈঠকে এতিয়া যথেষ্ট অস্বস্তিত পেলাইছে বোকাখাত কংগ্ৰেছৰ প্ৰাৰ্থীত্ব প্ৰত্যাশীসকলক৷