শিলচৰত ফেচবুকৰ সম্পৰ্কৰ চলেৰে এগৰাকী বিবাহিত মহিলাৰ ঘনিষ্ঠ হ’ব খোজা এজন যুৱকক কৌশলেৰে ফান্দত পেলাই প্ৰহাৰ কৰা ঘটনাটোত শিলচৰৰ বিধায়ক তথা বিধানসভাৰ প্ৰাক্তন উপাধ্যক্ষ বিধায়ক দিলীপ পালৰ নাম সাঙোৰ খাই পৰিছে।
জাবাদ হাছান লস্কৰ নামৰ যুৱকজনক মাৰপিট কৰাৰ অভিযোগ তুলি তেওঁৰ দেউতাক নইমূল ইচলাম লস্কৰে ২ আগষ্টৰ নিশা শিলচৰ সদৰ থানাত বিধায়কজনৰ লগতে তেওঁৰ ব্যক্তিগত নিৰাপত্তাৰক্ষী আৰু কেইজনমান যুৱকৰ বিৰুদ্ধে শিলচৰ থানাত এখন এজাহাৰ দাখিল কৰিছিল। অৱশ্যে এজাহাৰখন পিছত বুজাবুজিৰে উঠাই লোৱা হৈছে।
কিন্তু মাৰপিট কৰা সময়ৰ দৃশ্য সম্বলিত এটা ভিডিঅ’ ছ’চিয়েল মিডিয়াত ভাইৰেল হৈ পৰাত বিধায়কজনৰ স্থিতিক লৈ চৰ্চা হৈছে। ভিডিঅ’টোৰ দৃশ্যই ইয়াক ম’ৰেল পুলিচিঙৰ ঘটনা বুলি ভাবিবলৈ মানুহক বাধ্য কৰাইছে। আনহাতে যুৱকজনক আগুৰি লৈ মাৰপিট কৰি থকা উত্তেজিত জুমটোৰ মাজত ব্যক্তিগত সুৰক্ষাকৰ্মীৰ সহিতে বিধায়কজনকো দেখা গৈছে।
স্থানীয় সূত্ৰই কোৱা মতে, জাবাদ নামৰ ২০-২২ বছৰীয়া যুৱকজনে কিছু দিনৰ পূৰ্বে অঞ্চলটোৰ এগৰাকী বিবাহিত মহিলালৈ বুলি ফেইচবুক বন্ধুত্বৰ অনুৰোধ প্ৰেৰণ কৰে। মহিলাগৰাকীয়েও সেয়া গ্ৰহণ কৰে। তাতে উৎফুল্ল হৈ পৰে যুৱকজন আৰু সঘন বাৰ্তা বিনিময়েৰে সম্পৰ্কটোক অধিক মিঠা কৰাৰ চেষ্টা কৰে।
মহিলাগৰাকীয়ে অৱশ্যে সকলো কথা নিজৰ স্বামীক অৱগত কৰে আৰু জাবাদক তেওঁ চিনি পায় নেকি সেয়াও সোধে। মহিলাগৰাকীৰ গিৰীয়েকে চিনি নাপায় যদিও তেওঁ মহিলাগৰাকীৰ জাবাদৰ সৈতে কথা-বতৰাত বাধা নিদিয়ে।
সুযোগ বুজি জাবাদে মহিলাগৰাকীক ডেটিঙৰ বাবে প্ৰস্তাৱ দিয়ে। সেয়াই আছিল জাবাদে মাৰ খোৱাৰ বাবে নিজে বাছি লোৱা পথ।
মহিলাগৰাকী আৰু তেওঁৰ গিৰীয়েকে আঁচনি কৰি নিৰ্ধাৰিত সময়ত অম্বিকাপট্টী চৌৰংগীত লগ কৰিবলৈ তেওঁক জনায়, য’ত মহিলাগৰাকীৰ গিৰীয়েক আন বহুকেইজন স্থানীয় যুৱকৰ সৈতে ৰৈ আছিল।
নিৰ্ধাৰিত সময়ত এখন চিকচাক এ চি গাড়ীৰে মহিলাগৰাকীক লগ কৰিবলৈ উক্ত স্থানত উপস্থিত হোৱা জাবাদক আটাইকেইজনে গাড়ীৰ পৰা টানি চোঁচৰাই আনে আৰু গুৰুলাগুৰুলকৈ পিটন দিয়ে। তেওঁলোকে যুৱকজনৰ কাণ্ডক লাভ জিহাদ আখ্যা দিয়ে। মন কৰিব লগীয়া যে মাৰপিট কৰাই নহয়, তেওঁলোকে মাৰপিটৰ ঘটনাটো ফেচবুক লাইভ হিচাপে প্ৰচাৰ কৰিছিল আৰু এয়া যুৱকজনৰ লাভ জিহাদ বুলি দাবী কৰিছিল।
সেই সময়তে বিধায়ক দিলীপ পাল তেওঁৰ ব্যক্তিগত নিৰাপত্তাৰক্ষীজনৰ সৈতে তাত উপস্থিত হয়। বিধায়কজনৰ ঘৰ ঘটনাস্থলৰ পৰা মাত্ৰ ২০০ মিটাৰৰ দূৰত।
বিধায়কজনে নিজে মাৰপিটত লিপ্ত নহ’লেও যুৱকজনক ম’ৰেল পুলিচগিৰিৰ পৰা বচোৱাৰ কোনো চেষ্টা কৰা দেখা নগ’ল। বৰং তেওঁৰ ব্যক্তিগত নিৰাপত্তাৰক্ষীজনক সহযোগ কৰাহে দেখা গ’ল। অলপ পিছতে আৰক্ষী উপস্থিত হৈ যুৱকজনক থানালৈ লৈ যায় আৰু ৰাতিটো লকআপত ৰাখে।
পিছত উক্ত ৰাতিয়ে জাবাদৰ দেউতাক নইমূল ইচলাম লস্কৰে বিধায়কজন আৰু তেওঁৰ সমৰ্থক কেইজনমান তথা নিৰাপত্তাৰক্ষীজনৰ বিৰুদ্ধে তেওঁৰ পুতেকক মিছাকৈ লাভ জিহাদৰ অভিযোগত মাৰপিট কৰা বুলি এজাহাৰ দিয়ে।
যি নহওক আজি দুপৰীয়াৰ ভাগত দুয়ো পক্ষৰ বুজাবুজিৰ পিছত এজাহাৰ প্ৰত্যাহাৰ কৰাৰ লগতে যুৱকজনক থানাৰ পৰা মুকলি কৰি দিয়া হয়।
