“বহু সময়ত ব্যৰ্থতাই সফলতাৰ দুৱাৰ খুলি দিয়ে”, য়ু পি এছ চিত সফলতা দেখুওৱা শিৱসাগৰৰ ৰাহুল গুপ্তা

“বিফলতা সাময়িক হয় যেতিয়া মন দৃঢ় হয়। বহু সময়ত ব্যৰ্থতাই ব্যক্তিক সফল হোৱাৰ দুৱাৰহে খুলি দিয়ে। ধৈৰ্য্য, একাগ্ৰতা কঠোৰ শ্ৰম, সাধুতাই সফলতাৰ চাবি-কাঠী”, য়ু পি এছ চিৰ পৰীক্ষাত এইবাৰ সুখ্যাতিৰে উত্তীৰ্ণ হোৱা শিৱসাগৰৰ যুৱক ৰাহুল গুপ্তাই এই প্ৰেৰণাদায়ক মন্তব্য কৰে এদল ছাত্ৰ-ছাত্ৰীৰ সন্মুখত।

আজি শিৱসাগৰ বাণিজ্য মহাবিদ্যালয়ৰ ষষ্ঠ ষান্মষিকৰ বিদায়ী ছাত্ৰ-ছাত্ৰীৰ বাবে আয়োজিত এটা অনুষ্ঠানলৈ নিমন্ত্ৰণ জনোৱা হৈছিল কঠিন পৰীক্ষাত সফলতা দেখুওৱা যুৱকজনক।

ছাত্ৰ একতা সভাৰ উদ্যোগত অনুষ্ঠিত আৰু মহাবিদ্যালয়খনৰ অধ্যক্ষ ড০ সৌমাৰজ্যোতি  মহন্তই সঞ্চালনা কৰা অনুষ্ঠানটোত ছাত্ৰ-ছাত্ৰীসকলৰ লগত মত বিনিময় কৰে গুপ্তাই।

আৰ্থিক প্ৰতিকূলতাৰ সত্ত্বেও নিয়মীয়া অধ্যয়ন, পিতৃ-মাতৃ, শিক্ষক তথা শুভাকাংক্ষী ব্যক্তিৰ অনুপ্ৰেৰণাৰ বাবে আজি তেওঁ এই স্থানত উপনীত হোৱা বুলি কয় যুৱক ৰাহুলে।

ছাত্ৰ-ছাত্ৰীসকলে সোধা প্ৰশ্নৰ উত্তৰ দি তেওঁ য়ু পি এছ চিকে মুখ্য কৰি বিভিন্ন পৰীক্ষাৰ প্ৰস্তুতি, মৌখিক সাক্ষাৎকাৰৰ প্ৰস্তুতি, ক’চিং, আদি সম্পৰ্কে বিশদ বিৱৰণ দাঙি ধৰে।

তেওঁ সম্প্ৰতি সময়ত অসমৰ বহু ছাত্ৰ ছাত্ৰীয়ে য়ু পি এছ চিকে আদি কৰি বিভিন্ন প্ৰতিযোগিতামূলক পৰীক্ষাত অৱতীৰ্ণ হোৱাৰ লগতে সুখ্যাতিৰে উত্তীৰ্ণ হোৱাটো অসমৰ বাবে শুভ লক্ষণ বুলি মন্তব্য কৰে।

প্ৰসংগক্ৰমে তেওঁ অসম-মেঘালয় কেডাৰৰ বাবে নিৰ্বাচিত হোৱাৰ কথা দোহাৰি এই সুযোগ লাভ কৰিলে সাধ্যানুসাৰে ৰাজ্যখনৰ বিকাশৰ প্ৰচেষ্টা চলাব বুলি আত্মবিশ্বাসেৰে কয়।