কোনো লোকক প্ৰৱঞ্চনাৰ বাবে কু-বুদ্ধিৰ প্ৰৱঞ্চকে নানা উপায় অৱলম্বন কৰে। এনে প্ৰৱঞ্চকৰ জালত ভৰি দি বহু সময়ত বিয়াগোম লোকচানৰ সন্মুখীন হয় সাধাৰণ লোক। প্ৰৱঞ্চনাৰ বাবে এই ধূৰ্ত লোকসকলে নানা আজৱ উপায় গ্ৰহণ কৰাৰ বিষয়ে সকলোৰে জ্ঞাত।
কিন্তু প্ৰৱঞ্চনাৰ ফান্দত পেলোৱাৰ বাবে মহাকাশচাৰীৰ ৰূপ লোৱাৰ কথা কেতিয়াবা শুনিছে নে! এই আজৱ উপায় অৱলম্বন কৰিয়ে এক প্ৰৱঞ্চকে এগৰাকী মহিলাৰ পৰা লুটিছে ২৪ লাখ টকা। এই অদ্ভুত কাণ্ড সংঘটিত হৈছে জাপানত।
এক ভুৱা মহাকাশচাৰীয়ে পেলোৱা ফান্দত ভৰি দি দেশখনৰ এগৰাকী মহিলাই হেৰুৱাইছে ২৪ লাখ টকা। জাপানৰ স্থানীয় সংবাদ মাধ্যমত প্ৰকাশিত বাতৰি অনুসৰি জনপ্ৰিয় ছ’চিয়েল নেটৱৰ্ক ইনষ্টাগ্ৰামত মহাকাশচাৰীৰ পৰিচয় দিয়া এগৰাকী ব্যক্তিয়ে সংঘটিত কৰিছে এই আজৱ কাণ্ড।
ইনষ্টাগ্ৰামত ৰাছিয়াৰ মহাকাশচাৰীৰ পোছাক পৰিধান কৰি ফটো আপলোড কৰা ব্যক্তিগৰাকীয়ে জাপানৰ মহিলাগৰাকীৰ সৈতে চিনাকি হয়। তাৰ পাছতে দুয়োৰে মাজত এক সু-সম্পৰ্ক গঢ় লৈ উঠে।
জাপানৰ ছিগা পাৰফেকচাৰৰ বাসিন্দা এই ৬৫ বৰ্ষীয় মহিলাগৰাকীৰ যোৱা জুন মাহত এই ভুৱা মহাকাশচাৰীগৰাকীৰ সৈতে প্ৰথম পৰিচয় ঘটিছিল। প্ৰৱঞ্চক গৰাকীয়ে মহিলাগৰাকীক তেওঁ এটা স্পেচ ষ্টেচনত কাম কৰে বুলি জানিবলৈ দিয়ে।
কিছুদিন ধৰি ইনষ্টাগ্ৰামত কথা পতাৰ পাছত দুয়োগৰাকী প্ৰেমৰ বান্ধোনত বান্ধ খায়। আনকি ৬৫ বছৰ বয়সীয়া মহিলাগৰাকীক বিয়া পতাৰো প্ৰতিশ্ৰুতি দিয়ে প্ৰৱঞ্চকজনে।
কথা প্ৰসঙ্গতে প্ৰৱঞ্চকগৰাকীয়ে মহিলাগৰাকীক জাপানত এক নতুন জীৱন কটোৱাৰ ইচ্ছাৰ বিষয়ে প্ৰকাশ কৰে। কিন্তু পৃথিৱীৰ বাহিৰৰ এটা স্পেছ ষ্টেশ্যনত কাম কৰাৰ বাবে তেওঁৰ এই ইচ্ছা পূৰণত অসুবিধা হোৱা বুলি উল্লেখ কৰি পৃথিৱীলৈ উভটিবলৈ তেওঁক যথেষ্ট টকাৰ প্ৰয়োজন বুলি দুখ প্ৰকাশ কৰে।
যদি মহিলাগৰাকীয়ে তেওঁক ৪.৪ মিলিয়ন জাপানীজ য়েন প্ৰদান কৰে, তেতিয়া তেওঁ এটা ৰকেটৰ সহায়ত মহাকাশৰ পৰা পোনে পোনে জাপানত অৱতৰণ কৰিব পাৰিব আৰু তাৰপাছতে দুয়ো বিবাহপাশত আৱদ্ধ হ’ব বুলি প্ৰৱঞ্চক গৰাকীয়ে মহিলাগৰাকীক ভুৱা স্বপ্ন দেখায়।
ব্যক্তিগৰাকীৰ প্ৰতিশ্ৰুতিত ভোল গৈ মহিলাগৰাকীয়েও তেওঁক ১৯ আগষ্টৰ পৰা ৫ ছেপ্টেম্বৰৰ ভিতৰত এই টকাখিনি দিয়ে। ভাৰতীয় হিচাপত এই টকাখিনিৰ মূল্য হ’ব ২৪.৮ লাখ টকা। কিন্তু টকাখিনি পোৱাৰ পাছতো প্ৰৱঞ্চকগৰাকীয়ে মহিলাগৰাকীক আৰু অধিক টকা বিচাৰে।
তেওঁৰ এই আচৰণত মহিলাগৰাকীৰ মনত ক্ৰমে সন্দেহৰ সৃষ্টি হয় আৰু আৰক্ষীৰ কাষ চাপে। আৰক্ষীৰ অনুসন্ধানতে এই সমগ্ৰ প্ৰৱঞ্চনাৰ জালখন ফাদিল হয়। আৰক্ষীৰ তদন্ততহে তেওঁক বিয়া কৰোৱাৰ প্ৰতিশ্ৰুতি দিয়া ভুৱা মহাকাশচাৰীজন যে এজন প্ৰৱঞ্চকহে সেই কথা মহিলাগৰাকীয়ে জানিব পাৰে।
ইতিমধ্যে আৰক্ষীয়ে ঘটনা সন্দৰ্ভত তদন্ত আৰম্ভ কৰিছে। ভুৱা মহাকাশচাৰী ৰূপী প্ৰৱঞ্চকগৰাকীৰ সন্ধানত অভিযান আৰম্ভ কৰিছে জাপান আৰক্ষীয়ে। প্ৰৱঞ্চক গৰাকীৰ এই আজৱ কাণ্ড এতিয়া বিশ্বজুৰি চৰ্চিত হৈ পৰিছে।
