নিপন গোস্বামীৰ মৃত্যুৰ উৰাবাতৰি বিয়পোৱাসকলৰ বিৰুদ্ধে গোচৰ

শুকুৰবাৰে অসমৰ অভিনয় ক্ষেত্ৰখনৰ এগৰাকী উজ্জ্বল তাৰকা নিপন গোস্বামীৰ দেহাৱসান হোৱা বুলি প্ৰকাশ পোৱা এটা বাতৰিয়ে ছ’চিয়েল মিডিয়াত খলকনি তুলিছিল। কিন্তু এই বাতৰি আছিল সম্পূৰ্ণ মিছা। ইয়াৰ পাছতেই সৃষ্টি হয় প্ৰতিক্ৰিয়াৰ।

ইয়াৰ পাছতেই অভিনেতা নিপন গোস্বামীৰ পৰিয়ালে এই অপপ্ৰচাৰ চলোৱা য়ুজাৰৰ বিৰুদ্ধে মহানগৰীৰ চানমাৰি থানাত এখন এজাহাৰ দাখিল কৰে।

কালিয়ে নিপন গোস্বামীৰ বোৱাৰীয়েক কিংকিনী ভট্টাচাৰ্য্যই এজাহাৰ দাখিল কৰিছিল যদিও এই সন্দৰ্ভত কি ধাৰাত গোচৰ ৰুজু হ’ব সেয়া নিশ্চিত নোহোৱা বাবে এতিয়ালৈকে গোচৰটো পঞ্জীয়ন হোৱা নাই।

অৱশ্যে চানমাৰি থানাৰ ভাৰপ্ৰাপ্ত বিষয়াগৰাকী আমাক জানিবলৈ দিয়া মতে বিষয়টো আদালতলৈ প্ৰেৰণ কৰা হৈছে আৰু আদালতৰ পৰামৰ্শ অনুসৰি অতি সোনকালেই গোচৰটো ৰুজু হ’ব।

অভিনেতাগৰাকীৰ মৃত্যু হোৱা বুলি ছ’চিয়েল মিডিয়াযোগে উৰাবাতৰি বিয়পোৱা ফেইচবুক পেইজ আৰু একাউণ্টৰ গৰাকীসকলৰ বিৰুদ্ধে বিভিন্নজন সৰৱ হোৱাও দেখা গৈছে। লগতে এনেধৰণৰ অপপ্ৰচাৰৰদ্বাৰা জনপ্ৰিয় শিল্পীগৰাকীক অপমান কৰা হোৱা বুলিও বহুতেই মন্তব্য কৰিছে।

ফেইচবুকৰ কেইবাটাও পেইজ আৰু ব্যক্তি বিশেষৰ একাউন্টত অভিনেতাগৰাকীৰ সন্দৰ্ভত এই উৰাবাতৰি প্ৰকাশ পাইছিল।

সেই সমূহৰ ভিতৰত আছিল ‘হিমন্ত বিশ্ব শৰ্মা জিন্দাবাদ’, ‘Zubeen Garg fans Club all Assam’, ‘Troll Assamese Media’ আদি পেইজকেইটাও। এই ভুৱা বাতৰিয়ে স্বাভাৱিকতে গোস্বামীৰ লগতে তেওঁৰ পৰিয়াল তথা অনুৰাগীক আঘাত দিছে।

উল্লেখ্য যে, কিছুদিন পূৰ্বে নিপন গোস্বামীয়ে বাথৰুম পিচলি পৰা ফলত ভৰিত আঘাট পাইছিল। পাছত জি এন আৰ চি চিকিৎসালয়ত ভৰ্তী কৰোৱাত তেওঁ ভৰিৰ এটা সৰু অস্ত্ৰোপচাৰ হৈছিল। বৰ্তমান তেওঁ আৰোগ্যৰ দিশত থকা বুলি পৰিয়ালে জানিবলৈ দিছে।