কৃষক বিক্ষোভ: দাবী নামানিলে দেশজুৰি ৰে’ল অৱৰোধ কৰাৰ হুংকাৰ কৃষকৰ

কৃষক বিক্ষোভে দেশ উত্তাল কৰি ৰখাৰ সময়ত কেন্দ্ৰীয় চৰকাৰ বহুখিনি নমনীয় হৈ পৰিছে যদিও কৃষকসকলৰ স্থিতি আৰু দমনীয় ৰূপত প্ৰকাশ পাইছে।

কৃষকসকলৰ দাবী যে সংশোধনী নহয়, তিনিওখন কৃষি আইন বাতিল কৰিব লাগিব। আৰু সেই দাবী নামানিলে তেওঁলোকে দেশজুৰি ৰে’ল অৱৰোধৰ কাৰ্যসূচী গ্ৰহণ কৰিব বুলি হুংকাৰ দিছে কৃষক সংগঠনৰ নেতাসকলে।

বৃহস্পতিবাৰে কেন্দ্ৰ প্ৰস্তাৱক লৈ কৃষকসকলৰ মাজত এখন বৈঠক অনুষ্ঠিত হয়। বৈঠকত আন্দোলন আৰৰু তীব্ৰতৰ কৰি তোলাৰ সিদ্ধান্ত লোৱা হয়।

কৃষকসকলে দিল্লীলৈ অহা সকলো পথ অৱৰোধ কৰিব বুলি জানিবলৈ দিয়ে। লগতে দাবী মানি নল’লে ৰে’ল অৱৰোধ কৰা হ’ব বুলিও জনায়।

কৃষক নেতা বুটা সিঙে কয় যে এইবাৰ আন্দোলন কেবল মাত্ৰ পঞ্জাৱ-হাৰিয়ানাতে সীমাবদ্ধ নাথাকে, ই গোটেই দেশজুৰি চলোৱা হ’ব।

আনহাতে, বৃহস্পতিবাৰে চৰকাৰৰ ফালৰ পৰা কৃষি মন্ত্ৰী নৰেন্দ্ৰ তোমৰ আৰু ৰে’লমন্ত্ৰী পীয়ুষ গোয়েলে কৃষকসকলক আলোচনাৰ মাজলৈ আহিবলৈ আহ্বান জনায়।

কৃষিমন্ত্ৰী তোমৰে কয় যে আলোচনা যেতিয়া চলিছে তেতিয়া আন্দোলন তীব্ৰ কৰি তোলা উচিত নহয়। চৰকাৰৰ ফালৰ পৰা যিবোৰ প্ৰস্তাৱ পঠোৱা হৈছে সেইবোৰ কৃষকসকলক বিবেচনা কৰাৰ আহ্বান জনায় কৃষিমন্ত্ৰী গৰাকীয়ে।

কিন্তু এনে আবেদনৰ প্ৰতি গুৰুত্ব দিব খোজা নাই কৃষকনেতাসকলে।

বিগত প্ৰায় দুসপ্তাহ ধৰি দিল্লীৰ সীমান্তত কৃষকসকলে কৃষি আইন তিনিখনৰ বিৰুদ্ধে প্ৰতিবাদ সাৱ্যস্ত কৰি আহিছে।

কৃষকসকলে দাবী কৰে যে কেন্দ্ৰই ন্যুনতম সহায়ক মূল্য উঠাই দিব বিচাৰিছে আৰু বজাৰ ব্যৱস্থাক দুৰ্বল কৰি দিয়া হৈছে।

কৃষক নেতাসকলৰ কেন্দ্ৰৰ সৈতে এতিয়ালৈকে পাঁচবাৰকৈ আলোচনা হৈছে যদিও কোনো সমাধান সূত্ৰ ওলোৱা নাই।