বয়সৰ লগে লগে শাৰীৰিক অসুস্থতাৰ বাবেই ৰাজনীতিৰ পৰা সম্পূৰ্ণ সন্যাস ল’ব ছোনিয়া গান্ধীয়ে। অহা জানুৱাৰিতেই তেওঁৰ স্থানত কংগ্ৰেছে এগৰাকী নতুন সভাপতি নিৰ্বাচন কৰিব।
ৰাহুল গান্ধীয়ে এতিয়াও কংগ্ৰেছ সভাপতিৰ দায়িত্ব ল’বলৈ সাজু নোহোৱাত কংগ্ৰেছে নিৰ্বাচনৰ পথেই ল’ব লাগিব।
সূত্ৰসমূহৰ মতে, দলৰ লগতে য়ুপিএ মিত্ৰজোঁটৰ নেতৃত্বৰ পৰা অব্যাহতি ল’ব বিচাৰিছে ছোনিয়া গান্ধীয়ে। ইয়াৰ পূৰ্বে কংগ্ৰেছ সভাপতি পদৰ পৰা পদত্যাগ কৰিলেও য়ুপিএৰ অধ্যক্ষ পদত কাৰ্যনিৰ্বাহ কৰি আছিল ছোনিয়া গান্ধী।
কিন্তু এইবাৰ তেওঁ সেই পদৰ পৰাও অব্যাহতি ল’ব বিচাৰিছে। সেয়েহে, তেওঁৰ স্থানত নতুন এগৰাকী অধ্যক্ষৰ সন্ধানত নামিছে বিৰোধী মিত্ৰজোঁটৰ নেতাসকল।
বাতৰি অনুসৰি, য়ুপিএৰ অধ্যক্ষ পদৰ প্ৰবল দাবীদাৰ হোৱাৰ দৌৰত সকলোৰে আগত আছে এনচিপি নেতা শাৰদ পাৱাৰ।
প্ৰকৃততে, ছোনিয়া গান্ধীৰ পাছত কংগ্ৰেছৰ বাকী নেতাসকলৰ আঞ্চলিক দলসমূহৰ সৈতে সম্পৰ্ক সিমান ভাল নহয়। সেইদৰে, ৰাহুল গান্ধীক প্ৰধানমন্ত্ৰী মোদীৰ বিৰোধী নেতাৰ ৰূপত আগবঢ়াই দিয়াত বহুতৰে আপত্তি আছে।
তদুপৰি, বৰ্তমান কংগ্ৰেছ দলটো দুৰ্বল হৈ পৰালৈ চাই এগৰাকী সৰ্বসন্মত গ্ৰহণযোগ্য নেতাৰ সন্ধান কৰা হৈছে যিগৰাকীয়ে সকলোকে লগত লৈ আগবাঢ়িব পাৰে। এইক্ষেত্ৰত শাৰদ পাৱাৰকে বিৰোধী দলৰ নেতা হিচাপে নিৰ্বাচিত কৰাৰ সম্ভাৱনা অধিক বুলি সূত্ৰসমূহে জনায়।
বিৰোধী শত্ৰু-মিত্ৰ সকলো দলৰে সৈতে শাৰদ পাৱাৰৰ সম্পৰ্ক ভাল। তদুপৰি, ছোনিয়া গান্ধীৰ পাছতেই তেওঁৱেই হৈছে বিৰোধী মিত্ৰজোঁটৰ আটাইতকৈ পুৰণি নেতা। বিভিন্ন দলৰ সৈতে সন্তুলন ৰক্ষা কৰি চলাৰ ক্ষেত্ৰত পাৱাৰৰ দক্ষতাও আছে।
সকলো দিশ চালিজাৰি চাই য়ুপিএৰ পৰৱৰ্তী কাণ্ডাৰী হিচাপে শাৰদ পাৱাৰকেই দায়িত্ব অৰ্পণ কৰাৰ যথেষ্ট সম্ভাৱনা আছে। অৱশ্যে, অহা জানুৱাৰিতে এই সকলো কথা স্পষ্ট হৈ পৰিব।