বনকৰা যুৱতীক শাৰীৰিক নিৰ্যাতন চলোৱাৰ অভিযোগত বৃহস্পতিবাৰে দিনৰ প্ৰায় ২-৩০ মান বজাত মহানগৰীৰ গান্ধীবস্তি তিনিআলিত থকা প্ৰাক্তন মন্ত্ৰী তথা কংগ্ৰেছী নেতা ৰকিবুল হুছেইনৰ ভগ্নী চাবানা চুলতানাৰ ঘৰত চানমাৰি আৰক্ষীয়ে অভিযান চলায়।
বিগত ১০ বছৰ ধৰি আব্দুল লতিফুৰ আৰু চাবানা চুলতানাৰ ঘৰত বনকৰা হিচাপে থকা ২৫ বছৰীয়া যুৱতীগৰাকীক মাইফুল বেগম বুলি চিনাক্ত কৰা হৈছে। যুৱতী গৰাকীৰ ঘৰ কামৰূপ (গ্ৰাম্য) জিলাৰ ৰঙিয়াৰ তুলসীবাৰীত বুলি জানিব পৰা গৈছে।
ভুক্তভোগী যুৱতীগৰাকীৰ পৰিয়ালৰ অভিযোগৰ ভিত্তিতে ৰকিবুল হুছেইনৰ ভগ্নীৰ ঘৰত আৰক্ষীয়ে অভিযান চলাইছিল।
চানমাৰি আৰক্ষী থানাৰ ভাৰপ্ৰাপ্ত বিষয়া বীৰেন ডেকাই নৰ্থইষ্ট নাওৰ আগত কয় যে চানমাৰি আৰক্ষীৰ এটা দলে বৃহস্পতিবাৰে আবেলি গান্ধীৱস্তি তিনিআলিৰ লতিফুৰ ৰহমানৰ ঘৰৰ পৰা ভুক্তভোগী যুৱতীগৰাকীক উদ্ধাৰ কৰে।
ডেকাই কয় যে ৰহমান পৰিয়ালে পূৰ্বতে কেইবাবাৰো যুৱতীগৰাকীক শাৰীৰিকভাৱে নিৰ্যাতন চলাইছিল আৰু তাইক নিৰ্যাতনৰ বিষয়ে প্ৰকাশ নকৰিবৰ বাবে ব্লেকমেইল কৰিছিল।
আৰক্ষী সূত্ৰই লগতে কয় যে যুৱতীগৰাকীয়ে যদিওবা কেইবাৰো ৰহমানৰ ঘৰৰ পৰা বনকৰা ছোৱালীৰ কামটো এৰি যোৱাৰ প্ৰচেষ্টা চলাইছিল, তাইক বিয়া দিয়াৰ প্ৰলোভন দি বলপূৰ্বক ৰখা হৈছিল।
ভাৰপ্ৰাপ্ত বিষয়া বীৰেন ডেকাই কয়, ‘’ অভিযোগ অনুসৰি যুৱতীগৰাকীক যোৱা সোমবাৰে আব্দুল লতিফুৰ ৰহমানৰ পৰিয়ালে বেয়াকৈ মাৰধৰ কৰিছিল। ইয়াৰ পিছতে তাই তাৰ পৰা পলাই গৈ চুবুৰীয়াৰ ঘৰৰ পৰা সহায় বিচাৰিছিল। কিন্তু ৰহমানৰ পৰিয়ালে বলপূৰ্বক তাইক ঘৰলৈ লৈ আনে।‘’
ভুক্তভোগী গৰাকীৰ জ্যেষ্ঠ ভাতৃ আজমল আলীয়ে চানমাৰি থানাত এখন এজাহাৰ দাখিল কৰিছে। চানমাৰি আৰক্ষীয়ে ভাৰতীয় দণ্ডবিধিৰ ৩৪২, ৩২৫ আৰু ৩৪ ধাৰাৰ অধীনত এটা (৯৮২/১৮ নং) গোচৰ ৰুজু কৰিছে।
আৰক্ষী বিষয়া ডেকাই কয় যে আৰক্ষীয়ে ৰহমানৰ পৰিয়ালক আৰক্ষী থানাত হাজিৰ হোৱাৰ বাবে এক জাননী জাৰি কৰিব আৰু শুকুৰবাৰে ভুক্তভোগী গৰাকীৰ ভাষ্য লিপিবদ্ধ কৰিব।
তেওঁ লগতে কয়, ‘’ ঘটনাটো আমাৰ থানাৰ আওতাত পৰাৰ বাবে পল্টন বজাৰ আৰক্ষী থানাই গোচৰটো আমালৈ পঠিয়াই দিছে। আজমল আলী আৰু যুৱতীগৰাকীৰ পৰিয়ালৰ আন সদস্যসকলে বৃহস্পতিবাৰে আৰম্ভণিতে অভিযোগ দাখিল কৰিবলৈ পল্টন বজাৰ থানালৈ গৈছিল।‘’
