নৱ গঠিত তামুলপুৰ জিলাৰ কচুবাৰীস্থিত ঐতিহ্যমণ্ডিত মাহপ্ৰভু শ্ৰীশ্ৰী গোপাল আৰু জগন্নাথ থান সত্ৰত বৃহস্পতিবাৰে দিনজোৰা ধৰ্মীয় কাৰ্যসূচীৰে গোঁসাই বাঁহ খহোৱা উৎসৱ পালন কৰা হয়।
গোঁসাই বাঁহ খহোৱা উৎসৱ উপলক্ষে ৰাতিপুৱাৰে পৰা তামুলপুৰ জিলাৰ ভিন্ন প্ৰান্তৰ উপৰিও ৰঙিয়া, নলবাৰী, ঘগ্ৰাপাৰ, তুলসীবাৰী, বাইহাটা চাৰিআলি, কমলপুৰ, গুৱাহাটী আদি ঠাইৰ পৰাও অগণন ভক্তৰ সমাগম ঘটে।
বড়ো, ৰাভা, শৰণীয়া কছাৰী, হাজং, চানতাল, চাহ জনজাতি, বঙালী, নেপালী আদিকে ধৰি ভিন্ন জাতি-জনগোষ্ঠীৰ লোকৰ সমাগমেৰে মিলনৰ পৱিত্ৰ তীৰ্থ ভূমিলৈ পৰ্যবসিত হৈ পৰে কচুবাৰীৰ মহাপ্ৰভু শ্ৰীশ্ৰী গোপাল আৰু জগন্নাথ থান সত্ৰৰ চৌহদ।
ৰাতিপুৱাৰে পৰা নাম-কীৰ্তন, পূজা-অৰ্চনা, হোম যজ্ঞ আদিৰে উদুলি-মুদুলি হৈ পৰে ৫২৫ বছৰ অতিক্ৰম কৰা মাহপ্ৰভু গোপাল আৰু জগন্নাথ থান সত্ৰৰ চৌহদ।
দিনৰ ১-৩০ বজাত ভকত সকলে ঢোল-তাল,বৰকাঁহ, শংখ, ঘণ্টা বজাই নাম-কীৰ্তন কৰি গোপাল আৰু জগন্নাথ থান সত্ৰৰ চৌহদ সাতবাৰ প্ৰদক্ষিণ কৰে আৰু হৰিধ্বনি দি গোপাল আৰু জগন্নাথৰ প্ৰতিকী গোঁসাই বাঁহত বান্ধি দিয়া ছৰ, গামোচা, ৰুমাল, বিভিন্ন বস্ত্ৰ আদি খহোৱা পৰ্ব সমাপন কৰে।
বাঁহ খহোৱা পৰ্ব সমাপ্ত কৰি ভকত সকলে মহাপ্ৰভু গোপাল আৰু জাগন্নাথৰ ওচৰত সমূহীয়াভাৱে আঁঠু লৈ আশীৰ্বাদ গ্ৰহণ কৰে। পৰম্পৰাগত বাঁহ খহোৱা উৎসৱৰ লগত সংগতি ৰাখি মহাপ্ৰভু গোপাল আৰু জগন্নাথ থান সত্ৰৰ অধীনৰ সাতখন গাওঁৰ ২২ টা চুবুৰীৰ ৰাইজৰ উপৰিও সিমামুৰীয়া অঞ্চলৰ ৰাইজে দল বান্ধি থান সত্ৰৰ চৌহদত প্ৰীতি ভোজনৰ আয়োজন কৰে।
প্ৰীতি ভোজনৰ অন্তত শতাধিক স্বেচ্ছাসেৱকে থান সত্ৰত সমবেত হোৱা কেইবা সহস্ৰাধিক ভক্তপ্ৰাণ ৰাইজৰ মাজত প্ৰসাদ আৰু ভোগ বিতৰণ কৰে।
আজিৰ এই ঐতিহ্যমণ্ডিত বাঁহ খহোৱা উৎসৱত উপস্থিত থাকি বিটিচি প্ৰধান প্ৰমোদ বড়োৱেও ৰাইজৰ সৈতে শাৰী পাতি মাহপ্ৰভুৰ চৰণত সেৱা লৈ আশীৰ্বাদ গ্ৰহণ কৰে আৰু বিটিচিবাসী ৰাইজৰ লগতে সমগ্ৰ দেশবাসীৰ কুশল মংগল কামনা কৰি ভগৱানৰ ওচৰত প্ৰাৰ্থনা জনায়।
তামুলপুৰৰ কচুবাৰীৰ এই ঐতিহ্যমণ্ডিত গোপাল আৰু জগন্নাথ থান সত্ৰৰ গোঁসাই বাঁহ খহোৱা উৎসৱলৈ আহি অভিভূত হৈ পৰে সৰ্বস্তৰৰ ভক্তপ্ৰাণ ৰাইজ। প্ৰসাদ বিতৰণৰ অন্তত সফল সামৰণি পৰে মহাপ্ৰভু গোপাল আৰু জগন্নাথ থান সত্ৰৰ গোঁসাই বাঁহ খহোৱা উৎসৱৰ।
উৎসৱটি সফলতাৰে সামৰণি কৰাৰ ক্ষেত্ৰত সহায় সহযোগিতা আগবঢ়োৱা থান সত্ৰৰ সকলো বিষয়-ববীয়া, সদস্য, কৰ্মী আৰু সৰ্বস্তৰৰ ৰাইজক মহাপ্ৰভু শ্ৰীশ্ৰী গোপাল আৰু জগন্নাথ থান সত্ৰ পৰিচালনা সমিতিয়ে কৃতজ্ঞতা জনায়।
