বাংলাদেশ বায়ুসেনাৰ এখন যুদ্ধ বিমান সোমবাৰে ভয়ংকৰ দুৰ্ঘটনাত পতিত হয়। FT-7BGI নামৰ এই চীন-নিৰ্মিত ট্ৰেনিং যুদ্ধ বিমানখনে উৰণৰ কিছু সময়ৰ পিছতেই ঢাকাৰ উত্তৰ উপকণ্ঠত অৱস্থিত মাইলষ্টোন কলেজৰ বিল্ডিঙৰ ওপৰত খুন্দা মাৰে। এই দুৰ্ঘটনাত বিমানখনৰ পাইলটৰ মৃত্যু হোৱা নিশ্চিত কৰা হৈছে। লগতে বহু সংখ্যক ছাত্ৰ-ছাত্ৰী হতাহত হোৱাৰ আশঙ্কা প্ৰকাশ কৰিছে স্থানীয় প্ৰশাসনে।
বায়ুসেনাৰ আন্তঃসেৱা জনসংযোগ বিভাগৰ তথ্য অনুসৰি, যুদ্ধ বিমানখনে দুপৰীয়া ১:০৬ বজাত উৰা মাৰে আৰু ১:৩০ বজালৈ বিমানখন দুৰ্ঘটনাত পতিত হয়। বিমানখন ঢাকাস্থ হজৰত শ্বাহজাহান আন্তঃৰাষ্ট্ৰীয় বিমানবন্দৰৰ পৰা উৰা মাৰিছিল। বিমানখনৰ খহি পৰাৰ ঘটনা নিশ্চিত কৰিছে বিমানবন্দৰৰ এগৰাকী জ্যেষ্ঠ বিষয়াই।
জানিব পৰা মতে দুৰ্ঘটনাৰ সময়ত কলেজৰ ভবনত বহু ছাত্ৰ-ছাত্ৰী উপস্থিত আছিল। শিক্ষক-কৰ্মচাৰীসকলে দৌৰি গৈ তেওঁলোকক উদ্ধাৰ কৰাৰ চেষ্টা কৰে। অগ্নিদগ্ধ অৱস্থাত বহু ছাত্ৰ-ছাত্ৰীক উদ্ধাৰ কৰি ৰিক্সা আৰু অন্যান্য বাহনৰ সহায়ত চিকিৎসালয়লৈ প্ৰেৰণ কৰা হৈছে।
ঢাকা অগ্নিনিৰ্বাপক বাহিনীৰ ৮টা ঘটনাস্থলীত উপস্থিত হয়। লগতে সেনা বাহিনীৰ দলেও উদ্ধাৰ কাৰ্যত সহায় কৰিছে বুলি জানিব পৰা গৈছে। উল্লেখযোগ্য যে, FT-7BGI নামৰ এই যুদ্ধ বিমানখনে সাধাৰণতে প্ৰশিক্ষণৰ উদ্দেশ্যে ব্যৱহাৰ কৰা হয়। ইতিমধ্যে পাইলটজনৰ মৃত্যু নিশ্চিত কৰা হৈছে যদিও, ছাত্ৰ-ছাত্ৰীসহ আন হতাহতসকলৰ বিষয়ে সঠিক তথ্য এতিয়াও প্ৰকাশ কৰা হোৱা নাই। এই পৰ্যন্ত ঘটনাস্থলীত উদ্ধাৰ অভিযান অব্যাহত আছে।
