বাজেট লৈ সংবাদ মাধ্যমৰ আগত বিত্ত মন্ত্ৰী নিৰ্মলা সীতাৰমন; সলনি হ’ল পৰম্পৰা

পূৰ্বৰে পৰা সকলোৱে দেখি আহিছে যে যেতিয়াই দেশৰ বিত্ত মন্ত্ৰীয়ে বাজেট দাখিলৰ বাবে আহে, লগত লৈ আহে এটা ব্ৰীফকেছ। সেই ব্ৰীফকেছটোত বিত্ত মন্ত্ৰীয়ে বাজেটৰ সমস্ত লেখ-জোখ ভৰাই লৈ আনে। কিন্তু এইবাৰ সলনি হ’ল সেই পৰম্পৰা। বাজেটৰ পূৰ্বে ব্ৰীফকেছ হাতত লৈ ফটো উঠা পৰম্পৰাৰ অৱসান ঘটিল।

দেশৰ বিত্ত মন্ত্ৰী নিৰ্মলা সীতাৰমনে প্ৰথমবাৰৰ বাবে ছুটকেছ লোৱা পৰম্পৰা ভংগ কৰিলে। বিত্ত মন্ত্ৰীয়ে মন্ত্ৰালয়ত প্ৰৱেশ কৰিয়েই সকলোকে হতভম্ব কৰি তোলে।

প্ৰতিবাৰেই বিত্ত মন্ত্ৰীগৰাকীয়ে হাতত এটা ৰঙা ব্ৰীফকেছ লৈ আহে। সীতাৰমনে হাতত এখন ৰঙা মখমল কাপোৰেৰে বাজেটৰ কপিটো বান্ধি লৈ আহে। ৰঙা কাপোৰৰ ওপৰত আছিল ভাৰত ৰাষ্ট্ৰৰ চিহ্ন খোদিত আৰু ইয়াক ৰঙা-হালধীয়া ফিটা এডালেৰে বন্ধা আছিল।

ইয়াৰ পূৰ্বে বিত্ত মন্ত্ৰী যশোৱন্ত সিনহাই ফিটা লগোৱা চামৰাৰ বেগত আৰু প্ৰণৱ মুখাৰ্জীয়ে ৰঙা ভেলভেটৰ ছুটকেছত বাজেটৰ নথি পত্ৰ লৈ আহিছিল। ভাৰতত বাজেট আৰু বিত্ত মন্ত্ৰীৰ সৈতে ৰঙা ছুটকেছৰ সম্পৰ্কটো অংগাগীভাৱে জড়িত হৈ থকা বিষয়।

এই পৰম্পৰা আৰম্ভ হৈছিল ১৮৬০ চনত। তেতিয়াৰ পৰাই বিত্ত মন্ত্ৰীয়ে ৰঙা ৰঙৰ ছুটকেছ  প্ৰদৰ্শন কৰি আহিছে। ব্ৰিটেইনৰ ৰঙা গ্লেডষ্ট’ন বাজেট বক্স ২০১০ চনলৈকে প্ৰচলিত হৈ আছিল। ইয়াৰ পাছত ব্ৰিটেইনত ৰঙা ৰঙৰ চামৰাৰ বাকচ ব্যৱহাৰ হৈ আহিছে।

১৯৯৮-৯৯ চনৰ বাজেটৰ সময়ত তদানীত্বন বিত্ত মন্ত্ৰী যশোৱন্ত সিনহাই চামৰাৰ বেগত ফিটা বান্ধি বাজেট লগত লৈ আহিছিল।

পূৰ্বৰ প্ৰধান মন্ত্ৰী মনমোহন সিঙে ১৯৯১ চনত নিজৰ প্ৰসিদ্ধ বাজেট প্ৰদানৰ সময়ত আন এক ৰঙৰ বেগৰ প্ৰচলন কৰিছিল।

য়ুপিএৰ শাসনকালত বিত্ত মন্ত্ৰী থকা কালত প্ৰণৱ মুখাৰ্জীয়ে এটা ৰঙা ৰঙৰ বাকচৰ সৈতে সংসদত উপস্থিত হৈছিল। সেইটো ব্ৰিটেইনত ব্যৱহাৰ হোৱা বেগটোৰ দৰে দেখা গৈছিল।