‘চকীদাৰবিহীন’ বিজেপিৰ এটা নিৰ্বাচনী কাৰ্য্যালয়ত প্ৰৱেশ কৰি নিজৰ প্ৰচাৰ চলোৱা গুৱাহাটী লোকসভা সমষ্টিৰ নিৰ্দলীয় প্ৰাৰ্থী উপমন্যু হাজৰিকাৰ বিৰুদ্ধে আৰক্ষীৰ ওচৰত এজাহাৰ দাখিল কৰিছে ৰাজ্যিক বিজেপিয়ে।
৭ এপ্ৰিলত (দেওবাৰ) গুৱাহাটীৰ নুনমাটি থানাত নিৰ্দলীয় প্ৰাৰ্থীগৰাকীৰ বিৰুদ্ধে গোচৰ দিছে ৰাজ্যিক বিজেপিৰ আইন কোষে।
উল্লেখ্য যে, ৬ এপ্ৰিলত হাজৰিকাই নুনমাটিৰ পৰা প্ৰচাৰ কাৰ্য্য আৰম্ভ কৰাৰ পাছতেই নিউ গুৱাহাটী বাছ আস্থানৰ কাষতেই থকা বিজেপিৰ এটা জনশূন্য নিৰ্বাচনী কাৰ্যালয় দেখি আকস্মিকভাৱে তাত প্ৰৱেশ কৰিছিল। ‘শূন্য’ কাৰ্যালয়টটোত বহি উপমন্যু হাজৰিকাই কটাক্ষ কৰি কৈছিল“ এই শূন্য কাৰ্য্যালয়টো যেনেকৈ শূন্য, বিজেপিৰ প্ৰতিশ্ৰুতিবোৰো শূন্য”। ইয়াৰ বাতৰি সংবাদ মাধ্যমত প্ৰকাশ হোৱাৰ লগতে এই দৃশ্য সম্বলিত ভিডিঅ’টো ছ’চিয়েল মিডিয়াত ভাইৰেল হৈছিল।
সৰ্বত্ৰে ঘটনাটো চৰ্চা হোৱাৰ পিছত আজি ৰাজ্যিক বিজেপিৰ আইন কোষে দাখিল কৰা এজাহাৰত হাজৰিকাৰ বিৰুদ্ধে আনৰ কাৰ্যালয়ত অনাধিকাৰ প্ৰৱেশ কৰি সংবাদ মাধ্যমক সম্বোধন কৰাৰ অভিযোগ উত্থাপন কৰিছে। লগতে কাৰ্যালয়ৰ পৰা গুৰুত্বপূৰ্ণ নথি-পত্ৰ চুৰি হোৱা বুলিও দাবী কৰিছে ৰাজ্যিক বিজেপিয়ে।
লগতে পঢ়ক বিজেপিৰ কাৰ্য্যালয়ৰ পৰা প্ৰচাৰ কৰাৰ বিৰল সুযোগ পালে নিৰ্দলীয় উপমন্যু হাজৰিকাই
এজাহাৰ দাখিলৰ পাছতে ৰাজ্যিক বিজেপিৰ আইন পৰিক্ৰমা বিভাগৰ উপদেষ্টা বেণুধৰ নাথে কয়, “উপমন্যু হাজৰিকাই এইদৰে আন দলৰ কাৰ্য্যালয়ত অনধিকাৰ প্ৰৱেশ কৰা কাৰ্য্যই প্ৰকৃততে তেওঁ মানসিকভাৱে সুস্থ-সবল হয় নে নহয় তাত সন্দেহৰ সৃষ্টি কৰিছে”।
ইপিনে, নৰ্থ-ইষ্ট নাওৰ ফালৰ পৰা উপমন্যু হাজৰিকাক যোগাযোগ কৰা হৈছিল যদিও তেওঁক ফোনত পোৱা নগ’ল। অৱশ্যে হাজৰিকাৰ হৈ তেওঁৰ ৰিংকু ভূঞা নামৰ এজন সমৰ্থকে কয়, “অসমত সোমোৱা বিদেশীক চিনাক্ত কৰি বহিষ্কাৰ কৰিব নোৱৰা বিজেপিয়ে এতিয়া উপমন্যু হাজৰিকাৰ বিৰুদ্ধে চুৰিৰ অভিযোগ আনিছে। কিন্তু হাজৰিকাই তেওঁলোকৰ কাৰ্যালয়ত সোমোৱা ভিডিঅ’ আছে। বিজেপিৰ শূন্য কাৰ্যালয়টোৰ দৰে তেওঁলোকৰ প্ৰতিশ্ৰুতিবোৰো যে শূন্য সেই কথা প্ৰমাণ কৰিবলৈহে তেওঁ তালৈ গৈছিল”।
