কণ্ঠশিল্পী চানলৈ শিলগুটি নিক্ষেপৰ অপপ্ৰচাৰ চলোৱা এজনৰ বিৰুদ্ধে ভঙাগড় থানাত এজাহাৰ দাখিল
গুৱাহাটীৰ সৰুসজাই ষ্টেডিয়ামত কণ্ঠশিল্পী চানৰ সংগীতানুষ্ঠানত সংঘটিত সৰু এটা ঘটনাক সাম্প্ৰদায়িক ৰূপ দিবলৈ চেষ্টা কৰা এজন ব্যক্তিৰ বিৰুদ্ধে ভঙাগড় থানাত দাখিল কৰা হৈছে এখন এজাহাৰ।
কন্ঠশিল্পী চানৰ গালৈ শিলগুটি নিক্ষেপ কৰা বুলি অপপ্ৰচাৰ কৰাৰ লগতে ছ’চিয়েল মিডিয়া ফেচবুকত সাম্প্ৰদায়িক মন্তব্য আগবঢ়োৱাৰ বাবে কৃষক শ্ৰমিক উন্নয়ন পৰিষদে ব্যক্তিজনৰ বিৰুদ্ধে এই এজাহাৰ দাখিল কৰিছে।
উল্লেখ্য যে দেওবাৰে গুৱাহাটীৰ সৰুসজাইত ষ্টেডিয়ামত অনুষ্ঠিত কণ্ঠশিল্পী চানৰ সংগীতানুষ্ঠান চলি থকাৰ মাজতে শিল্পীজনৰ গালৈ শিলগুটি নিক্ষেপ কৰা বুলি অমৰদীপ পাল নামৰ এজন লোকে ফেচবুকত এটা প’ষ্ট দিয়াৰ পাছতে সৰ্বত্ৰ প্ৰতিক্ৰিয়াৰ সৃষ্টি হয়।
অমৰদীপ পালে ‘’চান বেংগলী হয় আৰু বাংলা গান গোৱাৰ বাবে শিল্পীজনৰ গালৈ শিল দলিওয়া হৈছে’’ বুলি ফেচবুকযোগে ভ্ৰান্ত প্ৰচাৰ বিয়পাইছিল।
ইয়াৰ পাছতে কৃষক শ্ৰমিক উন্নয়ন পৰিষদে সোমবাৰে ভঙাগড় থানাত পালৰ বিৰুদ্ধে এজাহাৰ দাখিল কৰে। পালক অতি শীঘ্ৰে গ্ৰেপ্তাৰ কৰাৰ দাবী জনাইছে কৃষক শ্ৰমিক উন্নয়ন পৰিষদে।
পৰিষদৰ সভাপতি প্ৰদীপ কলিতাই নৰ্থইষ্ট নাওক জনায় যে পালে ফেচবুকৰ জৰিয়তে সাম্প্ৰদায়িক মন্তৱ্য কৰি পৰিৱেশ বিনষ্ট কৰিব বিচাৰিছে। সেয়েহে ইয়াৰ বিৰুদ্ধে এজাহাৰ দাখিল কৰা হৈছে।
জানিব পৰা মতে, সৰুসজাইত ঘটনাতো যিহেতু বশিষ্ঠ থানাৰ অধীনত সংঘটিত হৈছে সেয়েহে ভঙাগড় থানাই গোচৰটো বশিষ্ঠ থানালৈ প্ৰেৰণ কৰিছে।