ৰাজ্যৰ চৰকাৰী বিদ্যালয়ৰ প্ৰাথমিক স্তৰৰ ছাত্ৰ-ছাত্ৰীৰ শিক্ষাৰ গুণগত মান উন্নত কৰাৰ উদ্দেশ্য আগত ৰাখি যোৱা বছৰৰ পৰা শিক্ষা বিভাগে আৰম্ভ কৰা গুণোৎসৱৰ দ্বিতীয় সংস্কৰণৰ প্ৰথম পৰ্যায় সফলতাৰে সম্পন্ন হৈ যোৱাৰ পাছত ৩১ অক্টোবৰ অৰ্থাৎ বুধবাৰৰ পৰা আৰম্ভ হ’ব দ্বিতীয় পৰ্যায়ৰ গুণোৎসৱ। দ্বিতীয় পৰ্যায়ৰ গুণোৎসৱে ৰাজ্যৰ ১৭খন জিলাৰ বিদ্যালয়ক সাঙুৰি ল’ব।
এইখিনিতে মন কৰিবলগীয়া কথা যে দ্বিতীয় বৰ্ষৰ দ্বিতীয় পৰ্যায়ৰ গুণোৎসৱ আৰম্ভ হোৱাৰ পূৰ্বে শিক্ষা বিভাগৰ কাণ্ডজ্ঞানহীন কাৰ্য পোহৰলৈ অহাত অসমীয়া মাধ্যমৰ বিদ্যালয় সমূহৰ মাজত এক অবাঞ্চিত পৰিস্থিতিৰ সৃষ্টি হৈছে। কিয়নো ৰাজ্য চৰকাৰে গুণোৎসৱৰ নিৰ্দেশাৱলী বাংলাভাষাত প্ৰকাশ কৰি বিদ্যালয় সমূহলৈ প্ৰেৰণ কৰিছে।
অসম চৰকাৰৰ বিয়াগোম শিক্ষা বিভাগৰ এনে আজৱ কাণ্ডত এতিয়া ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছে। অসমীয়া ভাষাৰ বিপৰীতে শিক্ষা বিভাগে প্ৰকাশ কৰা পত্ৰিকাখনত কেৱল বাংলা ভাষাৰ পয়োভৰ। পত্ৰিকাখনৰ বেটুপাতত গুৱাহাটীৰ ঠাইত লিখিছে গুয়াহাটি, কাহিলিপাৰাৰ ঠাইত কাহিলিপাড়া তথা মূল্যায়ণ নিৰ্দেশাৱলীৰ ঠাইত মূল্যায়ন নিৰ্দেশাবলি লিখাক কেন্দ্ৰ কৰি এতিয়া সমগ্ৰ ৰাজ্যৰে সচেতন ৰাইজৰ মাজত তুমুল প্ৰতিক্ৰিয়াৰ সৃষ্টি হোৱা পৰিলক্ষিত হৈছে।
উল্লেখ্য যে নাগৰিকত্ব সংশোধনী বিধেয়কৰ জৰিয়তে অসমত হিন্দু বাংলাদেশীক সংস্থাপনেৰে অসমীয়া ভাষাক বিপন্ন কৰিব নেকি বুলি সকলোৱো আশংকা কৰি থকাৰ সময়তে এনেদৰে ৰাজ্য চৰকাৰে প্ৰকাশ কৰা এখন পত্ৰিকাত বাংলা ভাষাৰ প্ৰয়োগ দেখি এতিয়া সকলোৰে চকু কপালত উঠিছে।
বাংলা ভাষাত গুণোৎসৱৰ নিৰ্দেশাৱলী প্ৰকাশ কৰা কাৰ্যত গোলাঘাট ছাত্ৰ সন্থাই তীব্ৰ ক্ষোভ প্ৰকাশ কৰাৰ লগতে অতি শীঘ্ৰে ৰাজ্য চৰকাৰৰ তৰফৰ পৰা এই সন্দৰ্ভত স্থিতি স্পষ্ট কৰিবলৈ আহ্বান জনায়।