শিন্দেক লৈ কৌতুক! কমেডিয়ান কুনাল কামৰাৰ বিৰুদ্ধে ক্ষুব্ধ শিৱসেনাৰ সমৰ্থক, হোটেলত চলালে তাণ্ডৱ

মহাৰাষ্ট্ৰৰ উপ-মুখ্যমন্ত্ৰী একনাথ শিন্দেক লৈ আপত্তিজনক মন্তব্য কৰাৰ অভিযোগ। শিৱসেনাৰ কৰ্মী আৰু সমৰ্থকৰ ক্ষোভৰ সন্মুখীন হ’ল কমেডিয়ান কুনাল কামৰা। ক্ষুব্ধ শিৱ সৈনিকসকলে মুম্বাইৰ হোটেলখনত তাণ্ডৱ চলায় য’ত কুনালে কমেডী শ্ব’ৰ সময়ত এই ‘আপত্তিজনক মন্তব্য’ কৰিছিল। কুনালৰ বিৰুদ্ধে এফআইআৰো দাখিল কৰা হৈছে।

শিৱসেনাই অভিযোগ কৰে যে কুনালে শিন্দেৰ ভাবমূৰ্তি কলংকিত কৰিবলৈ এনে কৰিছিল। তেওঁৰ উপৰিও শিৱসেনা (ইউ বি টি) দলৰ মুৰব্বী উদ্ধৱ থাকৰে, সঞ্জয় ৰাউত আৰু কংগ্ৰেছ নেতা ৰাহুল গান্ধীৰ বিৰুদ্ধেও অভিযোগ দাখিল কৰা হৈছে।

সোমবাৰে পুৱা ১১ বজাত শিৱসেনাৰ নেতা সঞ্জয় নিৰুপমে তেওঁক প্ৰহাৰ কৰাৰ ভাবুকি দিয়ে। শিৱসেনাৰ সাংসদ নৰেশ মাছে হুংকাৰ দি কয় যে কুনালে যাতে দেশৰ কোনো ঠাইলৈ মুক্তভাৱে যাত্ৰা কৰিব নোৱাৰে তেওঁলোকে তাৰ প্ৰতি লক্ষ্য ৰাখিব।

জানিব পৰা মতে, কুনালে ‘নয়া ভাৰত’ নামৰ এক অনুষ্ঠানত ভাৰতৰ সাম্প্ৰতিক ৰাজনৈতিক পৰিস্থিতিৰ বিষয়ে কিছু ব্যাংগাত্মক মন্তব্য কৰিছিল। শিন্দেৰ স্থিতি সলনিকলৈও কটাক্ষ কৰে। খোদ কুনালে পোষ্ট কৰা এটা ভিডিঅ’ত তেওঁ এটা জনপ্ৰিয় হিন্দী গীত অনুকৰণ কৰি শিন্দেৰ ভংগীমা আৰু শাৰীৰিক ৰূপৰ বৰ্ণনা কৰা দেখা গৈছে। এটা সময়ত শিন্দেক ‘দেশদ্ৰোহী’ বুলিও উল্লেখ কৰা হয়। অৱশ্যে কুনালে ক’তো শিন্দেৰ নাম উল্লেখ কৰা শুনা নাযায়।

এই ভিডিঅ’টো ছ’চিয়েল মিডিয়াত ভাইৰেল হোৱাৰ লগে লগে শিন্দে সেনাৰ কৰ্মী আৰু সমৰ্থকসকলে কুনালৰ বিৰুদ্ধে সৰৱ হয়। তেওঁলোকে দাবী কৰে যে পূৰ্ব পৰিকল্পনা অনুসৰি শিন্দেৰ বিৰুদ্ধে অপৰাধমূলক ষড়যন্ত্ৰ ৰচনা কৰা হৈছে। লগতে কুনালে ধনৰ বিনিময়ত এই কাম কৰিছে বুলিও অভিযোগ অনা হৈছে। শিৱসেনাৰ বিধায়ক মুৰজি পেটেলে থানাত কমেডিয়ানগৰাকীৰ বিৰুদ্ধে এফআইআৰ দাখিল কৰে। কিছু সময়ৰ পিছতে শিৱসেনাৰ কেইজনমান কৰ্মী আৰু সমৰ্থকে কুনালে আয়োজন কৰা মুম্বাইৰ খাৰ অঞ্চলৰ হোটেলখনত উপস্থিত হয়। তেওঁলোকে হোটেলখনত লণ্ডভণ্ড কৰাৰ অভিযোগ। চকীবোৰ দলিয়াই পেলাই দিয়ে।

শিন্দে নেতৃত্বাধীন শিৱসেনাৰ নেতা-কৰ্মীৰ এই আচৰণক গৰিহণা দিছে বিৰোধী কংগ্ৰেছ আৰু উদ্ধৱসেনাই। কুনালৰ কাষত থিয় দিছে আদিত্য থাকৰে আৰু সঞ্জয় ৰাউটে। আৰু ইমান বিতৰ্ক আৰু হুলস্থুলেৰে আগুৰি থকা কুনালে হাতত সংবিধান লৈ ছ’চিয়েল মিডিয়াত নিজৰ এখন ছবি পোষ্ট কৰে। তেওঁ লিখিছে, “আগলৈ যোৱাৰ একমাত্ৰ পথ।” অনুমান কৰা হৈছে যে তেওঁ এই ইংগিতদায়ক পোষ্টটোৰে সমালোচকক উত্তৰ দিব বিচাৰিছে।