নিৰ্দ্বিধাই সততে সাম্প্ৰদায়িক আৰু উচটনিমূলক মন্তব্য দি থকা বিজেপিৰ হোজাই সমষ্টিৰ বিধায়ক শিলাদিত্য দেবক তেওঁৰ শেহতীয়া মন্তব্যৰ বাবে ৰাষ্ট্ৰীয় নিৰাপত্তা আইনৰ অধীনত গ্ৰেপ্তাৰ কৰাৰ দাবী তুলিছে হাজো সমষ্টিৰ কংগ্ৰেছে।
আজি হাজো আৰক্ষী থানাত বিধায়কজনৰ বিৰুদ্ধে এই দাবীৰ সৈতে এখন এজাহাৰ দাখিল কৰিছে হাজো যুৱ কংগ্ৰেছ কমিটীৰ সভাপতি মুকুল আহমেদে।
নিজৰ এজাহাৰত মুকুল আহমেদে কয় যে যোৱা ১৩ অক্তোবৰত গুৱাহাটীৰ পাণ বজাৰত বোমা বিস্ফোৰণ হোৱাৰ পিছতে বিধায়কজনে উচটনিমূলক মন্তব্যৰে আলফা (স্বাঃ)ৰ সেনাধ্যক্ষ পৰেশ বৰুৱাক ঈদত বোমা বিস্ফোৰণৰ বাবে প্ৰত্যাহ্বান জনাইছিল। এটা ব্যক্তিগত খণ্ডৰ টিভি চেনেলৰ সন্মুখত তেওঁ এই উচটনিমূলক মন্তব্য কৰিছিল।
লগতে বিধায়কজনে পৰেশ বৰুৱাক ধুবুৰী, গোৱালপাৰা আৰু বৰপেটাত বোমা ফুটাবলৈও প্ৰত্যাহ্বান জনাইছিল।
এজাহাৰকাৰী মুকুল আহমেদৰ মতে, বিধায়ক শিলাদিত্যৰ এই উচটনিমূলক মন্তব্যবোৰ ৰাষ্ট্ৰীয় নিৰাপত্তা আইনৰ অধীনত বিচাৰযোগ্য। গতিকে তেওঁক অচিৰেই এই আইনৰ অধীনত গ্ৰেপ্তাৰ কৰি উচিত শাস্তি দিব লাগে।
শিলাদিত্য দেবৰ বিৰুদ্ধে জালুকবাৰী আৰক্ষী থানাতো এজাহাৰ
আনহাতে একেই উচটনিমূলক মন্তব্যৰ বাবে শিলাদিত্য দেবৰ বিৰুদ্ধে আজি এখন এজাহাৰ দাখিল কৰা হৈছে। উক্ত এজাহাৰখন দাখিল কৰিছে সদৌ অসম গৰিয়া যুৱ ছাত্ৰ পৰিষদে। ইপিনে কালি বৰপেটা জিলা আমছুৱেও বিধায়কজনৰ বিৰুদ্ধে একেটা কাৰণতে এজাহাৰ দাখিল কৰিছিল।
সততে উচটনিমূলক মন্তব্যৰে সমাজত অস্থিৰতা সৃষ্টি কৰিবলৈ চেষ্টা কৰি অহা বিজেপিৰ বিধায়কজনৰ বিৰুদ্ধে আৰক্ষীয়ে কি ব্যৱস্থা লয় সেয়া লক্ষণীয় হ’ব।
