তিনিচুকীয়া জিলাৰ অসম-অৰুণাচল সীমান্তৰ মাৰ্ঘেৰিটা মহকুমাৰ জাগুনস্থিত ৱাৰা মুংকাম বস্তিৰ সমীপত সেনা আৰু নগা উগ্ৰপন্থী এন এছ চি এন (কে)ৰ কেডাৰৰ মাজত গুলীয়াগুলী বাতৰি পোৱা গৈছে৷
আজি দুপৰীয়া ভাগত ভাৰতীয় সেনাৰ ৯ নং ৰাজপুত ৰাইফলছ’ আৰু এন এছ চি এন (কে) কেডাৰৰ মাজত সংঘটিত হয় এই গুলীয়াগুলীৰ ঘটনা।
বাতৰি প্ৰেৰণ কৰা সময়লৈকে কোনো পক্ষৰ হতাহতিৰ খবৰ নিশ্চিত হোৱা নাই যদিও এক সূত্ৰত দাবী কৰা অনুসৰি ভাৰতীয় সেনাৰ তিনিজন জোৱনাৰ সামান্য পৰিমাণে আঘাতপ্ৰাপ্ত হয়। প্ৰাপ্ত খবৰ অনুসৰি সেনাৰ নিয়মীয়া তহলদাৰী দলৰ লগত এন এছ চি এন (কে) কেডাৰৰ মুখামুখি হোৱাৰ ফলত সংঘৰ্ষৰ সূত্ৰপাত হয় বুলি সূত্ৰত প্ৰকাশ।
ভাৰতীয় সেনা-আৰক্ষীৰ শীৰ্ষ বিষয়াৰ এটা বৃহৎ দল ঘটনাস্থলীলৈ ৰাওনা হৈছে বুলি জানিব পৰা গৈছে। প্ৰথমাৱস্থাত উগ্ৰপন্থীৰ দলটোক আলফা (স্বা)ৰ সদস্য বুলি সন্দেহ কৰা হৈছিল।
দীৰ্ঘদিন ধৰি উগ্ৰপন্থী দলসমূহে অসম-অৰুণাচল প্ৰদেশৰ সীমামূৰীয়া এই অঞ্চলসমূহত কুচকাৱাজ অব্যাহত ৰখাৰ ফলত প্ৰায়ে কূটাঘাতমূলক ঘটনা সংঘটিত হৈ আহিছে ফলত অঞ্চলটোৰ স্থানীয় ৰাইজ শংকাত জীৱন নিৰ্বাহ কৰিবলগা হৈছে।
