প্ৰথমে ধৰ্ষণ তাৰপিছত হত্যা ; ১০ ফুট দ গাঁত খান্দি পুত্ৰবধুক পুতি থ’লে শহুৰেকে

নিজৰ বোৱাৰীয়েকক ধৰ্ষণ কৰি নৃশংসভাৱে হত্যা কৰাৰ অভিযোগ উত্থাপন হৈছে এগৰাকী ব্যক্তিৰ বিৰুদ্ধে। হত্যাকাণ্ডৰ পিছত অভিযুক্তই নিজৰ ঘৰৰ সমীপত ১০ ফুটৰ গাঁতত বোৱাৰীয়েকক সমাধিস্থ কৰি প্ৰমাণ ধ্বংসৰ চেষ্টা কৰে। এই চাঞ্চল্যকৰ ঘটনা সংঘটিত হৈছে হাৰিয়ানাৰ ফৰিদাবাদত।

ঘটনাৰ ২ মাহৰ পাছত আৰক্ষীয়ে মৃতদেহটো উদ্ধাৰ কৰি তদন্ত আৰম্ভ কৰে। মূল অভিযুক্ত শহুৰেকক গ্ৰেপ্তাৰ কৰে যদিও মৃতকৰ শাহুৱেক আৰু স্বামী বৰ্তমান পলাতক।

আৰক্ষীৰ মতে, ঘটনাৰ তদন্ত কৰি ইতিমধ্যে ভূপ সিং নামৰ মূল অভিযুক্তক গ্ৰেপ্তাৰ কৰা হৈছে। অভিযুক্তই জেৰাৰ সময়ত হত্যাকাণ্ডৰ কথাও স্বীকাৰ কৰিছে।

আৰক্ষীক দিয়া বিবৃতি অনুসৰি যোৱা ১৫ এপ্ৰিলত ২৪ বছৰীয়া বোৱাৰী তন্নুক হত্যাৰ পৰিকল্পনা কৰা হৈছিল। তন্নুৰ শাহুৱেকক উত্তৰ প্ৰদেশৰ ইটাৰ এখন বিয়ালৈ প্ৰেৰণ কৰা হৈছিল। ২১ এপ্ৰিলৰ নিশা তন্নুৰ স্বামী অৰুণে পত্নী আৰু ভগ্নী কাজলক টোপনিৰ বড়ি দিছিল। তাৰ পাছত ভূপ সিঙে বোৱাৰীয়েকক হত্যা কৰে। হত্যাৰ পূৰ্বেও মহিলাগৰাকীক ধৰ্ষণ কৰা বুলিও অভিযোগ উঠিছে। তদন্তকাৰীয়ে দাবী কৰিছে যে অৰুণে হত্যাকাণ্ডৰ বিষয়ে জানিছিল, কিন্তু ধৰ্ষণৰ বিষয়ে নাজানিছিল।

তদন্তকাৰীয়ে জনোৱা মতে, হত্যাকাণ্ডৰ পিছত তন্নুৰ মৃতদেহ ঘৰৰ ওচৰৰ পুতি থোৱা হয়। চুবুৰীয়াক কোৱা হৈছিল যে এই গাঁতটো নলা নিষ্কাশনৰ বাবে বনোৱা হৈছে। তাৰ পাছতে বোৱাৰীজনী নিৰুদ্দেশ হোৱা বুলি অঞ্চলটোত খবৰ বিয়পি পৰিল।

আৰক্ষীয়ে গাঁতটো খান্দি হত্যাৰ দুমাহৰ পাছত মৃতদেহটো উদ্ধাৰ কৰে। আৰক্ষীয়ে মূল অভিযুক্ত ভূপ সিঙক তিনিদিনীয়া জিম্মাত লৈ জেৰা আৰম্ভ কৰিছে। তন্নুৰ শহুৰেকৰ ঘৰৰ চাৰিজন সদস্য – ভূপ সিং, তেওঁৰ পত্নী ছোনিয়া, পুত্ৰ অৰুণ সিং আৰু কন্যা কাজলৰ বিৰুদ্ধে এফআইআৰ দাখিল কৰা হৈছে। অৱশ্যে আটাইকেইজনেই গ্ৰেপ্তাৰৰ আশংকাত পলায়ন কৰিছে।আৰক্ষীৰ মতে, ২০২৩ চনত অৰুণ আৰু তন্নুৰ বিবাহ হয়।কিন্তু বিয়াৰ পিছত শহুৰেকে যৌতুক বিচাৰি তাইক অত্যাচাৰ কৰিবলৈ আৰম্ভ কৰে। যাৰ বাবে অৱশেষত তন্নুক হত্যা কৰা হয়। অভিযুক্ত ভূপ সিঙক সোধা-পোছা কৰাৰ সমান্তৰালকৈ আৰক্ষীয়ে বাকী থকা অভিযুক্তক বিচাৰিবলৈ আৰম্ভ কৰিছে।