মহাকুম্ভৰ পৰা ওভতাৰ পথত সংঘটিত পথ দুৰ্ঘটনাত মৃত্যু ৫ জন বিদেশী নাগৰিকৰ
মহাকুম্ভৰ পৰা উভতি অহাৰ পথতে ঘটিল বিঘিনি। গাড়ী বাগৰি গৈ বাহন দুৰ্ঘটনাগ্ৰস্ত হোৱাৰ ফলত নিহত হয় ৫ জন বিদেশী নাগৰিক। শনিবাৰে নিশা বিহাৰৰ মুজাফ্ফৰপুৰ জিলাৰ মধুবনী বাইপাছৰ চাৰিলেনযুক্ত পথত সংঘটিত হয় এই দুৰ্ঘটনা।
অভিযোগ অনুসৰি বাইকাৰৰ ষ্টাণ্টৰ পৰা হাত সাৰিবলৈ গৈ ডিভাইডাৰত খুন্দা মৰাৰ ফলত গাড়ীখন উলটি পৰে। সংঘৰ্ষৰ তীব্ৰতা ইমানেই বেছি আছিল যে এছ ইউ ভিখন পাঁচবাৰ উলটি বাগৰি গৈছিল।
জানিব পৰা মতে, ৯ জন নেপালী নাগৰিকক লৈ প্ৰয়াগৰাজৰ পৰা উভতি আহিছিল গাড়ীখন। এজন বাইকাৰে মধুবনী বাইপাছত নিজৰ বাইক ষ্টান্ট প্ৰদৰ্শন কৰি আছিল। ষ্টান্টবাজিৰ পৰা হাত সাৰিবলৈ চেষ্টা কৰোতে গাড়ীখনে নিয়ন্ত্ৰণ হেৰুৱাই পোনে পোনে গৈ ডিভাইডাৰত খুন্দা মাৰে। লগে লগে গাড়ীখন পাঁচবাৰ উলটি খালে। গাড়ীখনত থকা ৯ জন লোকৰ ভিতৰত ৫জনৰ মৃত্যু হয়। বাকী চাৰিজন গুৰুতৰভাৱে আঘাতপ্ৰাপ্ত হৈ শ্ৰীকৃষ্ণ মেম’ৰিয়েল মেডিকেল কলেজ হাস্পতালত চিকিৎসাধীন হৈ আছে।
প্ৰত্যক্ষদৰ্শীয়ে জনোৱা মতে, দুৰ্ঘটনাটো ইমানেই ভয়াৱহ যে গাড়ীখন সম্পূৰ্ণৰূপে ছিন্নভিন্ন হৈ পৰে। খিৰিকীৰ সকলো গ্লাছ ছিন্নভিন্ন হৈ গৈছে। কেৱল সেয়াই নহয়, এটা চকা ভাঙি গাড়ীৰ ভিতৰলৈ সোমাই যায়।
স্থানীয় সূত্ৰৰ মতে, সেই সময়ত বাইপাছ পথত কেইবাজনো বাইকাৰে ষ্টাণ্ট কৰি আছিল। দ্ৰুতবেগী গাড়ীখনে তেওঁলোকক খুন্দা মাৰিব পাৰিলেহেঁতেন। সেই সংঘৰ্ষৰ পৰা হাত সাৰিবলৈ চেষ্টা কৰিয়েই চালকজনে ডিভাইডাৰত খুন্দা মাৰে। থিতাতে ৫ জন লোকৰ মৃত্যু হয়। খবৰ অনুসৰি এই আটাইকেইজনেই চুবুৰীয়া ৰাষ্ট্ৰ নেপালৰ নাগৰিক। মহাকুম্ভত অংশগ্ৰহণ কৰিবলৈ প্ৰয়াগৰাজলৈ আহিছিল।
আৰক্ষীয়ে জনোৱা মতে, গাড়ীখনত থকা এয়াৰবেগটো সময়মতে নোখোলাৰ বাবেই দুৰ্ঘটনাৰ প্ৰভাৱ অধিক ভয়াৱহ হৈ পৰিছে। দুৰ্ঘটনাটোত জড়িত গাড়ীখনত থকা আটাইকেইজনৰ নাম আৰু পৰিচয় প্ৰকাশ কৰা হৈছে। নেপালৰ বিষয়াৰ জৰিয়তে তেওঁলোকৰ পৰিয়ালৰ সৈতে যোগাযোগৰ প্ৰচেষ্টা চলোৱা হৈছে।