উত্তৰাখণ্ডত সংঘটিত হৈছে এক ভয়ানক পথ দুৰ্ঘটনা। নিয়ন্ত্ৰণ হেৰুৱাই প্ৰায় ১০০ ফুট তললৈ পৰি যায় যাত্ৰীবাহী এখন যাত্ৰীবাহী বাছ।
দেওবাৰে উত্তৰাখণ্ডত এই ভয়াবহ দুৰ্ঘটনাত ৫ জন লোকৰ মৃত্যু হয়। ইয়াৰ উপৰিও ১৭ জন লোক আহত হয়।
তেওঁলোকৰ বহুতৰে অৱস্থা সংকটজনক বুলি জানিব পৰা গৈছে। আহতসকলক উদ্ধাৰ কৰি চিকিৎসালয়লৈ লৈ যোৱা হৈছে।
আৰক্ষী সূত্ৰৰ পৰা জানিব পৰা মতে, দেওবাৰে উত্তৰাখণ্ডৰ পৌৰী গড়োৱাল জিলাত সংঘটিত হয় এই দুৰ্ঘটনা।
২২ জন যাত্ৰী লৈ পৌৰীৰ পৰা দহলচোৰীলৈ গৈ আছিল বাছখন। কেনেবাকৈ বাছখন নিয়ন্ত্ৰণ হেৰুৱাই প্ৰায় ১০০ ফুট খাৱৈত পৰি যায়।
দুৰ্ঘটনাটোৰ পিছতে স্থানীয় ৰাইজে উদ্ধাৰ কাম আৰম্ভ কৰে। তথ্য লাভ কৰি ঘটনাস্থলীত উপস্থিত হয় আৰক্ষী আৰু ৰাজ্যিক দুৰ্যোগ সঁহাৰি বাহিনী। থিতাতে মৃত্যু হয় ৪ জন যাত্ৰীৰ। বাকী ১৮ জন যাত্ৰীক উদ্ধাৰ কৰি চিকিৎসালয়লৈ লৈ যোৱা হয়। ইয়াৰে এজনৰ চিকিৎসাৰ সময়ত মৃত্যু হয়। মুঠতে এই দুৰ্ঘটনাত মৃত্যু হোৱা লোকৰ সংখ্যা ৫ জন।
প্ৰশাসনৰ তথ্য অনুসৰি আহত ১৭ জনৰ ভিতৰত ৮ জনক শ্ৰীনগৰৰ চিকিৎসালয়লৈ প্ৰেৰণ কৰা হৈছে কাৰণ তেওঁলোকৰ অৱস্থা সংকটজনক। বাকীকেইজন পৌৰী জিলা চিকিৎসালয়ত চিকিৎসাধীন হৈ আছে। এই দুৰ্ঘটনা কেনেদৰে সংঘটিত হয় তদন্ত অব্যাহত ৰাখিছে আৰক্ষীয়ে।
ইফালে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে দুৰ্ঘটনাৰ খবৰ পাই শোক প্ৰকাশ কৰিছে। এক্স হেণ্ডেলত লিখিছে, ‘বহুত দুখৰ ঘটনা। পৌৰীৰ কেন্দ্ৰীয় বিদ্যালয়ৰ সমীপত সংঘটিত বাছ দুৰ্ঘটনাত ৪ জন নিহত হৈছে। মৃতকৰ পৰিয়াললৈ সমবেদনা জ্ঞাপন কৰিলোঁ। ভগৱানে তেওঁলোকক এই শোকৰ পৰা মুক্ত কৰাত সহায় কৰক। ঘটনাস্থলীত উপস্থিত হৈ আৰক্ষী প্ৰশাসনে উদ্ধাৰ অভিযান আৰম্ভ কৰিছে। আহতসকলক ওচৰৰ চিকিৎসালয়ত ভৰ্তি কৰোৱা হৈছে। আহতসকলৰ আশু আৰোগ্য লাভৰ বাবে বাবা কেদাৰৰ ওচৰত প্ৰাৰ্থনা জনাইছোঁ।
এই ঘটনা সন্দৰ্ভত উত্তৰাখণ্ডৰ অতিৰিক্ত আৰক্ষী অধীক্ষক চন্দ্ৰমোহন সিঙে কয় যে মৃতকৰ পৰিচয় জানিবলৈ প্ৰচেষ্টা অব্যাহত আছে। এতিয়ালৈকে চিনাক্ত হোৱা সকলৰ পৰিয়াললৈ খবৰ প্ৰেৰণ কৰা হৈছে।
