গ্ৰেগ চেপেলৰ অধীনত ইৰফান পাঠানে বলাৰৰ পৰা বেটছমেন হৈ উঠিছিল। ২০০৭ চনত মহেন্দ্ৰ সিং ধোনিৰ নেতৃত্বত টি-২০ বিশ্বকাপ জয় কৰাত ইৰফান পাঠানে ডাঙৰ ভূমিকা পালন কৰিছিল।
সেই পাঠনক ২০০৯ চনত টিম ইণ্ডিয়াৰ এদিনীয়া দলৰ পৰা বাদ দিয়া হৈছিল। তেওঁক বাদ দিয়াৰ আঁৰত আছিল নেকি মহেন্দ্ৰ সিং ধোনী? এই ঘটনাৰ ১৬ বছৰৰ পাছত এই অভিযোগ উত্থাপন কৰিছে প্ৰাক্তন ক্ৰিকেটাৰগৰাকীয়ে। ২০০৮ চনত টেষ্ট দলৰ পৰা বাদ পৰাৰ এবছৰৰ ভিতৰতে পাঠানক এদিনীয়া দলৰ পৰাও বাদ দিয়া হৈছিল।
সৰ্বভাৰতীয় সংবাদ মাধ্যমক দিয়া এক সাক্ষাৎকাৰত ইৰফান পাঠানে কয়, ‘সেইটো ২০০৯ চনৰ কথা। সেই সময়ত আমি নিউজিলেণ্ড ভ্ৰমণত আছিলো। তেতিয়াই ঘটনাটো সংঘটিত হৈছিল। এই খবৰৰ বিষয়ে মই প্ৰশিক্ষক গেৰী কাৰ্ষ্টেনৰ পৰা জানিব পাৰিলোঁ। ইয়াৰ আগতে মোৰ ককাইদেউ (ইউছুফ পাঠান) আৰু মই শ্ৰীলংকাত খেলখনত জয়ী হৈছিলোঁ। আমি যি পৰিস্থিতিত জয়ী হৈছিলো সেয়া আছিল অতি কঠিন। মই নিশ্চিত যে মোৰ ঠাইত যদি আন কোনোবা থাকিলহেঁতেন তেন্তে এবছৰত তেওঁক ড্ৰপ কৰা নহ’লহেঁতেন। শ্ৰীলংকাৰ বিৰুদ্ধে সেই মেচখনত মাত্ৰ ২৭-২৮টা বলতে ৬০ ৰানৰ প্ৰয়োজন হৈছিল। আমি তাৰ পৰাই জয়ী হৈছিলো।’
তেওঁ আৰু কয়, ‘নিউজিলেণ্ডত প্ৰথম তিনিখন মেচৰ বাবে মোক দলৰ পৰা আঁতৰাই ৰখা হৈছিল। চতুৰ্থখন মেচ বৰষুণৰ বাবে ফলাফল বিহীন হৈ পৰে। মইও শেষৰ মেচখনতো নাছিলোঁ। তাৰ পাছত গেৰী ছাৰক সুধিলোঁ, ‘মোক কিয় ড্ৰপ কৰা হ’ল? যদি মোৰ উন্নতি কৰিব লগা আছে, তেন্তে আপুনি মোক ক’ব পাৰে। ইয়াৰ উত্তৰত তেওঁ দুটা কাৰণ দিলে।’
ইৰফান পাঠানৰ ভাষাত, ‘ভাৰতীয় প্ৰশিক্ষকগৰাকীয়ে কৈছিল যে এনে কিছুমান কথা আছে যিটো মোৰ হাতত নাই। তেতিয়া পাঠানে জানিবলৈ সুধিলে ‘তেন্তে কাৰ হাতত সেই দায়িত্ব?’। যদিও তেওঁ মোক একো কোৱা নাছিল। ইয়াৰ আঁৰত কোন আছে মই ইতিমধ্যে গম পাইছিলোঁ। অধিনায়কগৰাকীয়ে প্ৰথম একাদশ নিৰ্বাচন কৰে। সেই সময়ত ধোনী আছিল অধিনায়ক। তেওঁৰ সিদ্ধান্ত সঠিক আছিল নে ভুল আছিল মই নকওঁ। কাৰণ প্ৰতিজন অধিনায়কৰ নিজৰ নিজৰ ধৰণে দল পৰিচালনা কৰাৰ অধিকাৰ আছে।’
প্ৰাক্তন ক্ৰিকেটাৰ ইৰফান পাঠানৰ মতে, কাৰ্ষ্টেনে বুজাই দিয়া দ্বিতীয়টো কাৰণ আছিল যে সেই সময়ত টিম ইণ্ডিয়াই ৭ নম্বৰত এজন বেটিং অল ৰাউণ্ডাৰ বিচাৰিছিল। ইউছুফ পাঠানে সেই ভূমিকা গ্ৰহণ কৰিছিল। মন কৰিবলগীয়া যে বাদ পৰাৰ তিনি বছৰৰ পাছত তেওঁ ২০১২ চনত এদিনীয়া দললৈ ঘূৰি আহিছিল। যদিও তেওঁ মাত্ৰ ১২খন এদিনীয়া খেলাৰ সুযোগ পাইছিল। ভুৱনেশ্বৰ কুমাৰ আৰু ঈশান্ত শৰ্মাৰ স্থান নিশ্চিত হোৱাৰ পিছত ইৰফান পাঠানে চিৰদিনৰ বাবে ভাৰতীয় দলৰ পৰা বাহিৰ হৈ যায়।
ইফালে ৰাজনীতিৰ বলি বিৰাট কোহলী আৰু ৰোহিত শৰ্মা। এই কথা দাবী কৰিছিল প্ৰাক্তন দেশীয় ক্ৰিকেটাৰ কাৰ্ছন ঘাউৰীয়ে।
২০২৪ চনত টি-২০ আন্তৰ্জাতিক আৰু ২০২৫ চনত ইংলেণ্ড ছিৰিজৰ পূৰ্বে বিৰাট আৰু ৰোহিতে হঠাতে টেষ্ট ক্ৰিকেটৰ পৰা অৱসৰ গ্ৰহণ কৰিছিল। অৱসৰৰ কাৰণ হিচাপে দুৰ্বল ফৰ্মকে ধৰি আন বিভিন্ন কাৰণ উত্থাপন কৰা হৈছিল। কিন্তু প্ৰাক্তন দেশীয় ক্ৰিকেটাৰ কাৰ্ছন ঘাউৰীয়ে কয় যে এই অৱসৰৰ আঁৰত আছে লেতেৰা ৰাজনীতি।
