বিগত দুটা দিনত ব্ৰহ্মপুত্ৰৰ জলপৃষ্ঠই কাজিৰঙা ৰাষ্ট্ৰীয় উদ্যানৰ পূব সীমাৰ ধনশিৰিমুখত বিপদসীমা অতিক্ৰম কৰাৰ পাচত প্লাৱিত হৈছে কাজিৰঙা ৰাষ্ট্ৰীয় উদ্যানৰ বিস্তীৰ্ণ অঞ্চল।
ব্ৰহ্মপুত্ৰৰ বৰ্ধিত জলপৃষ্ঠই ভেঙ্গৰাই, ডিফলু মৰিধনশিৰি আদিৰে উদ্যানৰ ভিতৰলৈ প্ৰৱেশ কৰিছে।
আজি বিয়লিৰ তথ্য মতে ধনশিৰিমুখত ব্ৰহ্মপুত্ৰৰ জলপৃষ্ঠ বিপদ সীমাৰ ১১৮ মিটাৰ ওপৰত আছে। যাৰ বাবে প্লাৱিত হৈছে কাজিৰঙা।
সম্প্ৰতি কাজিৰঙা ৰাষ্ট্ৰীয় উদ্যানৰ ৩৩টা বন শিবিৰৰ তল প্লাৱিত হৈছে। ইয়াৰে কহঁৰা বনাঞ্চলৰ ৬টা, বাগৰি বনাঞ্চলৰ ৬টা, অগৰাতলি বনাঞ্চলৰ ১৬টা, বুঢ়াপাহাৰ বনাঞ্চলৰ ৩টা আৰু ষষ্ঠ সংযোজন এলেকাৰ ২টা বনশিবিৰৰ তলত পানী সোমাইছে।
ৰাষ্ট্ৰীয় উদ্যানখনত বান পৰিস্থিতি জটিল হোৱা নাই যদিও উদ্যানৰ ভিতৰত কৰ্মৰত বিভাগীয় হাতীবোৰ বাহিৰলৈ আনিবৰ বাবে নিৰ্দেশ দিয়াৰ লগতে সম্ভাব্য বন্যপ্ৰাণীৰ প্ৰব্ৰজনৰ প্ৰতি লক্ষ্য ৰাখি কাজিৰঙাৰ ৰাষ্ট্ৰীয় পথাংশত বেৰিকেড স্থাপন কৰি যান বাহনৰ গতিবেগ নিয়ন্ত্ৰণ ব্যৱস্থা কৰিছে উদ্যান কৰ্তৃপক্ষই ৷
অৱশ্যে দুই এটা প্ৰাণীৰ বাহিৰে দক্ষিণৰ কাৰ্বি পাহাৰলৈ এতিয়াও বন্যপ্ৰাণীৰ সামূহিক প্ৰব্ৰজন লক্ষণীয় হোৱা নাই ৷ তথাপিও কাৰ্বি পাহৰলৈ যোৱা বন্যপ্ৰাণীৰ নিৰাপত্তাৰ বাবে সতৰ্কতাৰ ব্যৱস্থা কৰিছে বন বিভাগে ৷
বানপানীৰ সময়ত ৰাষ্ট্ৰীয় উদ্যানখনত হব পৰা জটিল পৰিস্থিতিৰ বাবে ৰাজ্যৰ বিভিন্ন বনসংমণ্ডলৰ পৰা অতিৰিক্ত বনকৰ্মীক বিচাৰিছে কাজিৰঙাৰ কৰ্তৃপক্ষই ৷ ইয়াৰে ভালে সংখ্যক বনকৰ্মীয়ে আহি ইতিমধ্যেই কাজিৰঙাত যোগদান কৰিছেহি ৷
