পূৰ্বৰ দল এৰিলেও ক্ষমতা জুতি এৰিবলৈ প্ৰস্তুত নহয় প্ৰাক্তন বিপিএফ নেতা তথা ৰাজ্যসভাৰ প্ৰাক্তন বিশ্বজিৎ দৈমাৰী। আনহাতে বিপিএফ এৰি বিজেপিত যোগদান কৰাৰ বাবে বিশ্বজিৎ দৈমাৰীক পুৰস্কাৰ প্ৰদানৰ বাবে সাজু হৈছে বিজেপিৰ ৰাষ্ট্ৰীয় নেতৃত্ব।
বিটিচিৰ নিৰ্বাচনৰ পূৰ্বে ৰাজ্যসভাৰ সদস্য পদ ত্যাগ কৰি বিশ্বজিৎ দৈমাৰীয়ে পৰৱৰ্তী সময়ত নিজে জন্ম দিয়া বড়োলেণ্ড পিপলছ পাৰ্টি(বিপিএফ) ত্যাগ কৰি ভাৰতীয় জনতা পাৰ্টিত যোগদান কৰিছিল।
ইয়াৰ পিছতে তেওঁৰ ৰাজনৈতিক ভৱিষ্যতৰ কথাটো বিটিচিত ব্যাপকৰূপে চৰ্চিত হৈছিল। কি হ’ব পাৰে বিশ্বজিৎ দৈমাৰীৰ ৰাজনৈতিক ভৱিষ্যৎ?
বহুতে ধাৰণা কৰিছিল যে প্ৰাক্তন বিপিএফ নেতা তথা ৰাজ্যসভাৰ সাংসদগৰাকীয়ে পৰৱৰ্তী সময়ত বিটিচিৰ মুখ্য কাৰ্যবাহী পদটোলৈ হয়তো দৃষ্টি নিৱদ্ধ কৰিব। কিন্তু কাৰ্যক্ষেত্ৰত ৰাজ্যসভাৰ প্ৰাক্তন সাংসদগৰাকীয়ে মন্ত্ৰী হিমন্ত বিশ্ব শৰ্মাৰ সৈতে বিটিচি নিৰ্বাচনৰ নিৰ্বাচনী প্ৰচাৰত বিজেপিক নেতৃত্ব প্ৰদান কৰিলেও নিজে সেই নিৰ্বাচনত প্ৰাৰ্থী হিচাপে থিয় হোৱা নাছিল।
বিটিচি নিৰ্বাচনৰ ফলাফল ঘোষণা কৰাৰ বিজেপিয়ে য়ুপিপিএল আৰু গণসুৰক্ষা পাৰ্টি সৈতে প্ৰমোদ বড়োৰ নেতৃত্বত বিটিচি পৰিষদ গঠন কৰে।
বিটিচি পৰিষদ গঠন হোৱাৰ পিছতে বিশ্বজিৎ দৈমাৰীৰ ৰাজনৈতিক ভৱিষ্যতক লৈ কিছু লোকৰ মাজত পুনৰ উৎসুকতাৰ সৃষ্টি হয়।
এই উৎসুকতাৰ এতিয়া অৱসান ঘটাইছে বিজেপিৰ ৰাষ্ট্ৰীয় নেতৃত্বই। আগন্তুক ৰাজ্যসভাৰ উপ নিৰ্বাচনত বিজেপিয়ে অসমৰ খালী হৈ থকা আসনখনৰ বাবে বিশ্বজিৎ দৈমাৰীক প্ৰাৰ্থীত্ব প্ৰদান কৰিছে বিজেপিৰ ৰাষ্ট্ৰীয় নেতৃত্বই।
ভাৰতীয় জনতা পাৰ্টিৰ কেন্দ্ৰীয় কাৰ্যালয়ে প্ৰকাশ কৰা এক প্ৰেছ বিজ্ঞপ্তিযোগে ৰাজসভাৰ উপ নিৰ্বাচনত অসমৰ খালী হৈ থকা ৰাজ্যসভাৰ আসনখনৰ বাবে বিশ্বজিৎ দৈমাৰীক প্ৰাৰ্থীত্ব দিয়াৰ কথা ঘোষণা কৰিছে।
উল্লেখ্য যে বিশ্বজিৎ দৈমাৰীয়ে পদত্যাগ কৰাৰ পাছত খালী হোৱা ৰাজ্যসভাৰ আসনখন পূৰণ কৰাৰ বাবে অহা ১ মাৰ্চত উপ-নিৰ্বাচন অনুষ্ঠিত হ’ব।
