তিনিচুকীয়াৰ ঘটনাক নলবাৰীৰ ঘটনাৰ ‘কাউন্টাৰ প্ৰডাক্ট’ বুলি উল্লেখ কৰি ইয়াৰ বাবে চৰকাৰক সংযম ৰক্ষা কৰি চলাৰ আহ্বান জনাইছে প্ৰাক্তন মুখ্য মন্ত্ৰী তথা অগপৰ জ্যেষ্ঠ নেতা প্ৰফুল্ল কুমাৰ মহন্তই। উলুবাৰীৰ হোটেল প্ৰিয়া পেলেচত প্ৰাক্তন মুখ্য মন্ত্ৰী গৰাকীয়ে এখন সংবাদমেলত এইদৰে মন্তব্য কৰে।
‘’বিজেপিয়ে সংযম ৰক্ষা নকৰাৰ বাবেহে এনে ঘটনা সংঘটিত হৈছে,’’-মহন্তই কয়।
প্ৰাক্তন মুখ্য মন্ত্ৰী মহন্তই লগতে তিনিচুকীয়াৰ ঘটনাৰ পাছত বিজেপিৰ ৰাজ্যিক সভাপতি ৰঞ্জিত দাসে কৰা মন্তব্যকো দুৰ্ভাগ্যজনক আখ্যা দিয়ে।
আনহাতে, জাতিৰ সংকটৰ সন্ধিক্ষণত সোঁতৰ বিপৰীতে যোৱা সকলক উভতি অহাৰ আহ্বান জনায় মহন্তই। তেওঁ সদৌ অসম কৰ্মচাৰী পৰিষদক আন্দোলনৰ বাবে ওলাই অহাৰ বাবে ধন্যবাদ জ্ঞাপন কৰে।
ইপিনে, কেন্দ্ৰীয় চৰকাৰে হিন্দু নাগৰিকক সংস্থাপন দিব বিচৰা সন্দৰ্ভত মহন্তই ‘’যদি ধৰ্মীয় নিৰ্যাতনৰ বলি হৈ ভাৰতলৈ আন দেশৰ মানুহ আহিছে তেনেহ’লে ভাৰত চৰকাৰে ৰাষ্ট্ৰসংঘক বিষয়টো অৱগত কৰোৱা নাই কিয়?’’ বুলি প্ৰশ্ন কৰে।
তেওঁ লগতে ‘’ইয়াৰ দ্বাৰা দেশখনৰ ওপৰত বদনাম হে জাপি দিয়া হৈছে’’ বুলি মন্তব্য কৰে।
মহন্তই জানিব দিয়ে যে কাইলৈ নতুন দিল্লীত উত্তৰ-পূবৰ ১১ টা ৰাজনৈতিক দলৰ প্ৰতিনিধিয়ে ৰাষ্ট্ৰপতি আৰু প্ৰধান মন্ত্ৰীক সাক্ষাৎ কৰিব।
