সৰ্বানন্দ মুখ্য মন্ত্ৰী নে পুতলা মুখ্যমন্ত্ৰী মোৰ সন্দেহ হৈছে : তৰুণ গগৈ

‘’সৰ্বানন্দ মুখ্য মন্ত্ৰী হয় নে নহয়, নে পুতলা মুখ্যমন্ত্ৰী মোৰ সন্দেহ হৈছে। তেওঁৰ যদি সৎ সাহস আছে মোৰ সৈতে মুকলি তৰ্কলৈ আহক। মোদীৰ ৫ বছৰ আৰু তেওঁৰ তিনিবছৰত কি কৰিলে হিচাপ দিয়ক।‘’ এই মন্তব্য প্ৰাক্তন মুখ্য মন্ত্ৰী তৰুণ গগৈৰ।

দিচপুৰৰ হোটেল ৰিভিয়াৰাত শনিবাৰে এখন সংবাদমেলত বক্তব্য দাঙি ধৰি প্ৰাক্তন মুখ্য মন্ত্ৰী তৰুণ গগৈয়ে বিজেপি চৰকাৰ তীব্ৰ সমালোচনা কৰে।

তেওঁ কয়, ‘’২০১৪ চনৰ তুলনাত মোদীৰ আস্থা একেবাৰে হ্ৰাস পাইছে। মোদীৰ আশ্বাস যে মিছা আছিল সেয়া ৰাইজে বুজি পালে।  এই নিৰ্বাচন আটাইতকৈ গুৰুত্বপূৰ্ণ। মোদীয়ে একনায়কত্ববাদ চলাইছে। দেশৰ লাখ লাখ ৰাইজে চকীদাৰ চৌৰ হে বুলি ক’বলৈ আৰম্ভ কৰিছে। আমাৰ যুদ্ধ সাম্প্ৰদায়িকতা নীতিৰ বিৰুদ্ধে।‘’

মোদীয়ে জনসাধাৰণৰ মাজৰ একতা খৰ্ব কৰিব বিচাৰিছে বুলি অভিযোগ কৰি গগৈয়ে লগতে কটাক্ষ কৰি কয় যে চকীদাৰ হোৱাৰ পাছত এই পাৰ্টীৰ বিল্ডিং বেছি হ’ল।

আনহাতে, মুখ্য মন্ত্ৰী সৰ্বানন্দ সোণোৱালক আক্ৰমণৰ লক্ষ্য কৰি গগৈয়ে কয়, ‘’আটাইতকৈ দুৰ্নীতিপৰায়ণ হৈছে সৰ্বানন্দ। মই প্ৰত্যাহ্বান জনাইছো, কেনেকৈ ইমান হেলিকপ্তাৰ আৰু চাৰ্টাৰ প্লেন উৰুৱাইছে?’’

গগৈয়ে এক গুৰুতৰ অভিযোগ উত্থাপন কৰি লগতে কয় যে ‘’নাগৰিকত্ব বিধেয়কৰ বিৰোধিতা কৰা এটা এটাকৈ নেতাক কিনিছে? আজি কিয় আন্দোলন হোৱা নাই? আমাৰ দিনত জনজাতিকৰণ নকৰাক লৈ কিমান আন্দোলন হৈছিল এতিয়া কিয় নাই?’’

ইপিনে, ইয়াৰ মূল নায়ক হিমন্ত বিশ্ব শৰ্মা বুলি উল্লেখ কৰি তেওঁ বুৰঞ্জীত কলংকিত হিচাপে থাকি যাব বুলিও গগৈয়ে মন্তব্য কৰে।

আনহাতে, প্ৰাক্তন মুখ্য মন্ত্ৰীগৰাকীয়ে অভিযোগৰ আঙুলি তুলি প্ৰশ্ন কৰে, ‘’৫ বছৰত ৫ খন দলঙৰ এটাও খুটা পুতিব পৰা নাই কিয়?’’ ইয়াৰ চাৰিখন কংগ্ৰেছৰ দিনৰে বুলিও গগৈয়ে দাবী কৰে।

গগৈয়ে এইমছৰ কিমান কাম কৰিলে? বুলি প্ৰশ্ন কৰি মন্তব্য কৰে যে পৰিৱৰ্তন আমি আনিলো, অসমলৈ শান্তি আমি আনিলো, এওঁলোকে কি কৰিলে? অসমৰ পৰা বিশেষ মৰ্য্যদা কাঢ়িহে নিলে।

অসমক অৱজ্ঞা কৰা এনে প্ৰধান মন্ত্ৰী কেতিয়াও দেখা নাই বুলি গগৈয়ে মোডীক তীব্ৰ সমালোচনা কৰে।

অতুল বৰা আৰু কেশৱ মহন্ত অকৃতজ্ঞ বুলি উল্লেখ কৰি এওঁলোকে অসমী আইক বেছিবলৈয়ো কুন্ঠাবোধ নকৰে বুলি গগৈয়ে মন্তব্য কৰে।

গগৈয়ে বিশ্বনাথৰ দৰে উদাহৰণ অসমত আগতে দেখা নাই বুলি কোৱাৰ লগতে  সৰ্বাৰ চকুৰ আগত এনেধৰণৰ ঘটনা ঘটি থকাৰ বাবে সংখ্যালঘুসকলৰ ভয় হৈছে বুলিও মন্তব্য কৰে।

‘’জিলা পৰিষদৰ সদস্য সদস্যাৰ বাবে হায়াৰ ছেকেণ্ডেৰী পাছ লাগিছিল। এই আইন প্ৰযোজ্য কৰিছিল বিজেপিয়ে। কুইন ওজা কেনেকৈ যোগ্য হ’ল লেকসভাৰ বাবে?,’’-গগৈয়ে প্ৰশ্ন কৰে।

আনহাতে, হিমন্ত বিশ্ব শৰ্মাক কটাক্ষ কৰি গগৈয়ে কয়, ‘’নেডাৰ আহ্বায়ক হিমন্তই অসমতে নাচি বাগি থাকোতেই গ’ল। বেলেগ ৰাজ্য মেঘালয়, মণিপুৰলৈ এবাৰো দেখোন নগ’লেই প্ৰচাৰৰ বাবে। ২৪ ঘন্টা নাচি থাকিলেও যোৱাবাৰতকৈ এইবাৰ ভোট কমকৈ পাব।‘’

প্ৰাক্তন মুখ্য মন্ত্ৰী গৰাকীয়ে লগতে  আশা ব্যক্ত কৰি কয়, ‘’মোৰ দৃঢ় বিশ্বাস ৰাইজে বিজেপিক এশিকনি দিব। প্ৰথম পৰ্য্যায়ৰ তিনিটা আসন পামেই। ডিব্ৰুগড় আৰু লখিমপুৰত অলপ কমপিটিশ্যন হ’ব।‘’