জনসংযোগ সঞ্চালকালয়ৰ প্ৰাক্তন সঞ্চালক জ্যোতিপ্ৰসাদ শইকীয়াৰ দেহাৱসান
তথ্য আৰু জনসংযোগ সঞ্চালকালয়ৰ প্ৰাক্তন সঞ্চালক জ্যোতিপ্ৰসাদ শইকীয়াৰ আজি ৰাতিপুৱা নিজ বাসগৃহত দেহাৱসান ঘটে।
বিশিষ্ট লেখক, সাংবাদিক শইকীয়াই ১৯৭৫ চনত জনসংযোগ বিভাগত অতিৰিক্ত সঞ্চালক হিচাপে যোগদান কৰি পৰৱৰ্তী সময়ত সঞ্চালক হিচাপে কাৰ্য্যনিৰ্বাহ কৰিছিল।
ভাৰতীয় প্ৰশাসনীয় সেৱাৰ বাবে নিৰ্বাচিত হৈ শইকীয়াই নগাঁও জিলাৰ উপায়ুক্ত হিচাপে যোগদান কৰি পাছত পদোন্নতি লৈ তথ্য আৰু জনসংযোগ বিভাগৰ আয়ুক্ত সচিব পদত কাৰ্যনিৰ্বাহ কৰে।
প্ৰাক্তন সঞ্চালকগৰাকীৰ মৃত্যুত আজি তথ্য আৰু জনসংযোগ সঞ্চালকালয়ত সঞ্চালক অনুপম চৌধুৰীৰ উপস্থিতিত এখনি শোকসভা অনুষ্ঠিত হৈ যায়।
সভাত সুদক্ষ সঞ্চালকগৰাকীৰ বিভিন্ন দিশ আলোকপাত কৰি বিষয়া-কৰ্মচাৰীসকলে শ্ৰদ্ধাৰে স্মৰণ কৰে।
বিষয়াগৰাকীৰ বিদেহী আত্মাৰ সদগতিৰ বাবে ভগৱানৰ ওচৰত মৌন প্ৰাৰ্থনা জনোৱাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰা হয়।
জ্যোতিপ্ৰসাদ শইকীয়াই তথ্য আৰু জনসংযোগ সঞ্চালকালয়ৰ সঞ্চালক হিচাপে কাৰ্য্যনিৰ্বাহ কৰাৰ উপৰিও দৈনিক অসম কাকতৰ সম্পাদক হিচাপেও কাৰ্য্যনিৰ্বাহ কৰিছিল।