পুনৰ পাকিস্তানী বেটছমেন বাবৰ আজমৰ পক্ষত মত প্ৰকাশ কৰিছে ইংলেণ্ডৰ প্ৰাক্তন অধিনায়ক নাছিৰ হুছেইনে।
”মই ৰাজনীতিৰ মাজলৈ নাযাওঁ, মানচেষ্টাৰ চিটিয়ে মানচেষ্টাৰ য়ুনাইটেড অথবা এভাৰটনে লিভাৰপুৰৰ সৈতে প্ৰিমিয়াৰ লীগত নেখেলাৰ দলে ভাৰত-পাকিস্তানেও নেখেলে কিন্তু আই পি এল আৰম্ভ হ’ব আৰু বাবৰ আজম তাত নাথাকিব। বাবৰ আজম ভাল খেলুৱৈ তেওঁ আই পি এলত খেলিব লাগে,” নাছিৰ হুছেইনে এইদৰে কয়।
ইয়াৰ পূৰ্বেও নাছিৰ হুছেইনে বাবৰ আজমক সমৰ্থন কৰি ভাৰতৰ বাবে পাকিস্তানৰ ক্ৰিকেট স্তিমিত হৈ আছে বুলি আওপকীয়াকৈ মন্তব্য কৰিছিল।
ইংলেণ্ড আৰু পাকিস্তানৰ মাজত চলি থকা টেষ্ট শৃংখলাৰ প্ৰথমখন টেষ্টত বাবৰ আজমে প্ৰথম ইনিংছত ৬৯ ৰান কৰাৰ বিপৰীতে দ্বিতীয় ইনিংছত কোনো ৰান নকৰাকৈ পেভিলিয়ন মুখি হৈছিল।
উল্লেখযোগ্য যে, মুম্বাইত সন্ত্ৰাসবাদী আক্ৰমণ সংঘটিত হোৱাৰ পাছৰে আই পি এলত পাকিস্তানী ক্ৰিকেটাৰক নিষিদ্ধ কৰা হৈছিল।
তাৰ পূৰ্বে ছোৱেইব আখতাৰ, ছোৱেইব মালিককে ধৰি ভালেকেইগৰাকী আগশাৰীৰ পাকিস্তানী ক্ৰিকেটাৰে ভাৰতৰ মাটিত আই পি এলত অংশ লৈছিল।
