আই এন এক্স মিডিয়া গোচৰত বিগত আগষ্ট মাহত চি বি আয়ে গ্ৰেপ্তাৰ কৰা প্ৰাক্তন বিত্ত মন্ত্ৰী পি চিদাম্বৰৰ জামিন আবেদন বুধবাৰে উচ্চতম ন্যায়ালয়ে মঞ্জুৰ কৰে।
আই এন এক্স মিডিয়া গোচৰত বিগত ১০৬ দিন ধৰি বন্দী হৈ আছিল কংগ্ৰেছৰ জেষ্ঠ নেতাগৰাকী।
উচ্চতম ন্যায়ালয়ৰ পৰা জামিন লাভ কৰাৰ পাছতে তিহাৰ কাৰাগাৰৰ পৰা মুকলি আকাশৰ তললৈ আহিব পাৰিব চিদাম্বৰম।
ন্যায়াধীশ আৰ বানুমথিৰে গঠিত উচ্চতম ন্যায়ালৰ তিনিজনীয়া বিচাৰপীঠে বুধবাৰে চিদাম্বৰৰ জামিন আবেদন মঞ্জুৰ কৰে।
উল্লেখযোগ্য যে, চিদাম্বৰমে অক্টোবৰত চি বি আইৰ পৰা জামিন লাভ কৰিছিল যদিও পৰৱৰ্তী সময়ত ১৭ অক্টোবৰত তেওঁক পুনৰ ই ডিয়ে গ্ৰেপ্তাৰ কৰিছিল।
বুধবাৰে চিদাম্বৰৰ জামিন সন্দৰ্ভত ৰায়দান কৰি ন্যয়াধীশ বোপান্নাই প্ৰাক্তন মন্ত্ৰী গৰাকীৰ জামিন মঞ্জুৰ কৰিলেও তেওঁ অনুমতি নোহোৱাকৈ দেশ এৰি যাব নোৱাৰে বুলি উল্লেখ কৰে।
আনহাতে, মুকলি আকাশৰ তললৈ আহিলেও চিদাম্বৰমে গোচৰৰ অনুসন্ধান প্ৰক্ৰিয়াৰ লগত সহযোগ কৰিব লাগিব আৰু সংবাদ মাধ্যমৰ আগত আই এন এক্স মিডিয়া গোচৰ সম্পৰ্কত কোনোধৰণৰ মন্তব্য প্ৰদান কৰিব নোৱাৰিব বুলিও বোপান্নাই লগতে জনায়।
আই এন এক্স মিডিয়া গোচৰত অভিযুক্ত পি চিদাম্বৰমৰ পুত্ৰ কাৰ্তি চিদাম্বৰমেও উচ্চতম ন্যায়ালয়ৰ ৰায়ক আদৰণি জনায়।
কংগ্ৰেছৰ সাংসদ শশী থাৰুৰেও ন্যায়ালয়ে দীৰ্ঘ সময়ৰ বাবে ৰাজ্যসভাৰ সন্মানীয় সাংসদ এগৰাকীক এনেদৰে বন্দী কৰি ৰখাটো উচিত হোৱা নাছিল বুলি মন্তব্য কৰি উচ্চতম ন্যায়ালয়ে এই ৰায়দান পূৰ্বে দিব লাগিছিল বুলি কয়।
