বিয়া নোহোৱাকৈয়ে মাতৃ হ’ল উত্তৰ প্ৰদেশৰ এখন গাঁৱৰ ৪০ গৰাকী কুমাৰী ছোৱালী! ঘটনাটো কি?

উত্তৰ প্ৰদেশৰ বাৰাণসীৰ মালহিয়া গাঁৱৰ দুটা সম্প্ৰদায়ৰ কমেও ৪০ গৰাকী অবিবাহিত কুমাৰী ছোৱালীয়ে তেওঁলোকৰ মোবাইল ফোনত এটা মেছেজ লাভ কৰে। তাত লিখা আছিল, মহিলা আৰু শিশু উন্নয়ন মন্ত্ৰালয়ৰ পুষ্টি কাৰ্যসূচীৰ অধীনত গৰ্ভৱতী মাতৃৰ তালিকাত তেওঁলোক আছে।

ইয়াৰ পিছতে ছোৱালীকেইজনী আৰু তেওঁলোকৰ পৰিয়াল আতংকিত হৈ পৰে। গাঁৱখনৰ সাহনী আৰু মল্লেইন সম্প্ৰদায়ৰ এই ছোৱালীকেইজনীয়ে ঘটনা সন্দৰ্ভত ততাতৈয়াকৈ গাঁৱৰ মুৰব্বী অমিত পেটেলৰ সৈতে যোগাযোগ কৰে।

লগতে পঢ়কঃ বেটিং ব্যৰ্থতাই ডুবালে ভাৰতক! টি-২০ শৃংখলাত সমতা স্থাপন কৰিলে দক্ষিণ আফ্ৰিকাই

গাঁওবুঢ়া অমিত পেটেলে এই ঘটনাত চৰম আশ্চৰ্য্য প্ৰকাশ কৰে। তেওঁ কয় যে ছোৱালীকেইজনীয়ে মাতৃ স্বাস্থ্য পঞ্জীয়নৰ বাবে নহয়, ভোটাৰ আইডি আপডেটৰ বাবেহে তথ্য জমা দিয়াৰ কথা আছিল। অংগনবাড়ী কৰ্মীৰ পৰা বিষয়টো জানিব বিচৰাত তেওঁ প্ৰথমে ইয়াক এটা দুৰ্ঘটনা বুলি উৰুৱাই দিয়ে।

পেটেলে প্ৰশ্ন কৰে, ইমান ডাঙৰ ভুল কেনেকৈ হ’ব পাৰে, যাৰ ফলত ৩৫-৪০ জন লোকৰ ওপৰত প্ৰভাৱ পৰিল? তেওঁ অংগনবাড়ী কেন্দ্ৰসমূহৰ কাম-কাজ সন্দৰ্ভত তদন্তৰ দাবী জনাই গাঁওবাসীয়ে উপযুক্ত সাহায্য লাভ নকৰাৰ অভিযোগ উত্থাপন কৰে।

এই সন্দৰ্ভত বাৰাণসীৰ মুখ্য উন্নয়ন বিষয়া হিমাংশু নাগপালে কয় যে, এটা ভুল হৈছিল যাৰ ফলত অবিবাহিত ছোৱালীকেইজনীক গৰ্ভৱতী হিচাপে পঞ্জীয়ন কৰা হৈছিল।

লগতে পঢ়কঃ নিদ্ৰাহীনতাত ভুগিছে! নিশা ভাল টোপনিৰ বাবে চেষ্টা কৰি চাওক এই ৩-২-১ৰ গোল্ডেন ৰুল

নাগপালে লগতে কয় যে ভোটাৰ পঞ্জীয়নৰ দায়িত্বত থকা বুথ পৰ্যায়ৰ বিষয়া হিচাপেও কাম কৰা স্থানীয় অংগনবাড়ী কৰ্মীসকলে ভুলতে ভোটাৰ পঞ্জীয়ন আৰু পুষ্টি কাৰ্যসূচীৰ প্ৰ-পত্ৰ মিহলাই পেলাইছিল। অভিযোগ দাখিল কৰাৰ পিছত ভুলটো ধৰা পৰে আৰু শুধৰাই ডাটা পৰ্টেলৰ পৰা আঁতৰাই পেলোৱা হয়। উক্ত অংগনবাড়ী কৰ্মীজনক জাননী জাৰি কৰা হৈছে আৰু ঘটনাৰ সঠিক তদন্তৰ বাবে পদক্ষেপ গ্ৰহণ কৰা হৈছে।