দেশৰ ৫১ সংখ্যক মুখ্য ন্যায়াধীশ হিচাপে আজি শপত গ্ৰহণ কৰিলে ন্যায়াধীশ সঞ্জীৱ খান্নাই। সোমবাৰে পুৱা ৰাষ্ট্ৰপতি ভৱনলৈ গৈ তেওঁ শপতবাক্য পাঠ কৰে। ৰাষ্ট্ৰপতি দ্ৰৌপদী মুৰ্মুৱে দেশৰ নতুন মুখ্য ন্যায়াধীশগৰাকীক শপতবাক্য পাঠ কৰোৱায়।
উল্লেখ্য যে দেওবাৰে উচ্চতম ন্যায়ালয়ৰ মুখ্য ন্যায়াধীশ পদৰ পৰা অৱসৰ গ্ৰহণ কৰে ডি ৱাই চন্দ্ৰচুড়ে। ইয়াৰ পিছতে সোমবাৰে দেশে নতুন মুখ্য ন্যায়াধীশ লাভ কৰে। অৱশ্যে সঞ্জীৱ খান্নাই মুখ্য ন্যায়াধীশৰ বাবে আবণ্টিত বাংলো ব্যৱহাৰ নকৰে বুলি জনাইছে।
সোমবাৰে ৰাষ্ট্ৰপতি ভৱনত মুখ্য ন্যায়াধীশৰ শপত গ্ৰহণ অনুষ্ঠানত অংশগ্ৰহণ কৰে প্ৰধানমন্ত্ৰী নৰেন্দ্ৰ মোদীয়ে। উপ-ৰাষ্ট্ৰপতি জগদীপ ধনকৰ, প্ৰতিৰক্ষা মন্ত্ৰী ৰাজনাথ সিংও উপস্থিত থাকে। বিদায়ী মুখ্য ন্যায়াধীশ ডি ৱাই চন্দ্ৰচুড়ো তাত উপস্থিত আছিল।
লগতে পঢ়কঃ ট্ৰাম্পে ফোন কৰিলে পুটিনক, ইউক্ৰেইন যুদ্ধৰ বিষয়ে কি বাৰ্তা দিলে আমেৰিকাৰ নৱনিৰ্বাচিত ৰাষ্ট্ৰপতিয়ে
মন কৰিবলগীয়া যে ১৭ অক্টোবৰত মুখ্য ন্যায়াধীশ পদৰ বাবে সঞ্জীৱ খান্নাৰ নাম প্ৰস্তাৱ কৰা হৈছিল। ইয়াৰ পিছত ২৪ অক্টোবৰত কেন্দ্ৰই এই প্ৰস্তাৱত ছীলমোহৰ মাৰে। অৱশেষত ১১ নৱেম্বৰত মুখ্য ন্যায়াধীশ হিচাপে শপত গ্ৰহণ কৰে সঞ্জীৱ খান্নাই।
সঞ্জীৱ খান্নাই আগন্তুক ৭ মাহৰ বাবে মুখ্য ন্যায়াধীশৰ পদত অধিষ্ঠিত থাকিব। তেওঁ ২০২৫ চনৰ ১৩ মে’ত অৱসৰ ল’ব। কিন্তু শপত গ্ৰহণ কৰাৰ পূৰ্বে দেশৰ মুখ্য ন্যায়াধীশৰ জীৱনৰ পৰা বাদ পৰে তেওঁৰ হেঁপাহৰ প্ৰাতঃভ্ৰমণ। আচলতে প্ৰতিদিনে পুৱা উঠি কেইকিলোমিটাৰমান খোজ কঢ়াটো ন্যায়াধীশ খান্নাৰ দীৰ্ঘদিনীয়া অভ্যাস। প্ৰতিদিনে পুৱা তেওঁ দিল্লীৰ লোধি গাৰ্ডেন এলেকাৰ মুকলি আকাশৰ তলত কেইবা কিলোমিটাৰ খোজ কাঢ়িছিল। কিন্তু মুখ্য ন্যায়াধীশ হোৱাৰ পিছত ‘বিখ্যাত’ হোৱাৰ সূত্ৰে নিৰাপত্তা কটকটীয়া কৰা হয়। ফলত মৰ্নিং ৱাক বন্ধ হৈ পৰিছে।
উল্লেখ্য যে ন্যায়াধীশ সঞ্জীৱ খান্নাই চাৰি দশকৰো অধিক সময় ধৰি আইনী বৃত্তিৰ সৈতে জড়িত হৈ আছে। ১৯৮৩ চনত তেওঁ দিল্লীৰ তিছ হাজাৰী আদালতত অধিবক্তা হিচাপে কাম কৰিবলৈ আৰম্ভ কৰিছিল। ২০০৫ চনত তেওঁ দিল্লী উচ্চ ন্যায়ালয়ৰ অতিৰিক্ত ন্যায়াধীশ হিচাপে নিযুক্তি লাভ কৰে। এবছৰৰ পাছত তেওঁ দিল্লী উচ্চ ন্যায়ালয়ৰ স্থায়ী ন্যায়াধীশ পদলৈ উন্নীত হয়।
লগতে পঢ়কঃ বেটিং ব্যৰ্থতাই ডুবালে ভাৰতক! টি-২০ শৃংখলাত সমতা স্থাপন কৰিলে দক্ষিণ আফ্ৰিকাই
ন্যায়াধীশ খান্নাই ২০১৯ চনৰ ১৮ জানুৱাৰীত উচ্চতম ন্যায়ালয়ৰ ন্যায়াধীশ হিচাপে নিযুক্তি লাভ কৰিছিল। প্ৰসংগক্ৰমে উচ্চতম ন্যায়ালয়ৰ ন্যায়াধীশ হোৱাৰ আগতে তেওঁৰ কোনো উচ্চ ন্যায়ালয়ৰ মুখ্য ন্যায়াধীশ হিচাপে অভিজ্ঞতা নাছিল। ফলত তেওঁ এই প্ৰথমবাৰৰ বাবে মুখ্য ন্যায়াধীশ হিচাপে কাম কৰিব।
