বিদ্যালয়ত থাকোঁতেই হঠাৎ পেটত অসহ্যকৰ বিষ অনুভৱ কৰিছিল ছাত্ৰীগৰাকীয়ে। তাৰ পিছত স্কুলৰ শৌচাগাৰলৈ যায়। তাতেই জন্ম পায় গৰ্ভস্থ সন্তানে।
জানিব পৰা মতে, মাতৃ আৰু সন্তান দুয়ো বৰ্তমানৰ সুস্থ।
ইতিমধ্যে এই ঘটনাত POCSO আইনৰ অধীনত চাৰিজন লোকৰ বিৰুদ্ধে এফআইআৰ দাখিল কৰা হৈছে।
কৰ্ণাটকৰ যাদগিৰিৰ এখন বিদ্যালয়ত এই ঘটনা সংঘটিত হৈছে। যোৱা ২৭ আগষ্টৰ দিনৰ প্ৰায় ২ বজাত এই ঘটনা সংঘটিত হৈছিল।
নাবালকৰ সহপাঠীয়ে ঘটনা সন্দৰ্ভত বিদ্যালয় কৰ্তৃপক্ষক অৱগত কৰে। মাতৃ আৰু নৱজাতক দুয়োটাকে ততাতৈয়াকৈ চিকিৎসালয়লৈ প্ৰেৰণ কৰা হয়।
অভিযোগ অনুসৰি প্ৰায় ৯ মাহ পূৰ্বে তাইক যৌন নিৰ্যাতন চলোৱা হৈছিল। কিন্তু প্ৰথম অৱস্থাত ভুক্তভোগীয়ে এই ঘটনা বা কোনো অভিযুক্তৰ বিষয়ে একো ক’ব বিচৰা নাছিল।
কৰ্ণাটক শিশু অধিকাৰ সুৰক্ষা আয়োগে এই সন্দৰ্ভত প্ৰতিবেদন বিচাৰিছে।
আৰক্ষীৰ দাবী, তদন্তত এজন ২৮ বছৰীয়া যুৱকৰ নাম সাঙুৰ খাইছে। ভুক্তভোগী সুস্থ হ’লেই জেৰা কৰা হ’ব। আনহাতে, আৰক্ষীয়ে জনোৱা মতে, বিদ্যালয় কৰ্তৃপক্ষ বা নাবালকৰ ডাঙৰ ভাতৃয়েও এই ঘটনাৰ বিষয়ে আৰক্ষীক অৱগত কৰাটো প্ৰয়োজনীয় বুলি অনুভৱ কৰা নাছিল।
সেয়েহে, হোষ্টেলৰ ৱাৰ্ডেন, স্কুলৰ অধ্যক্ষ, ষ্টাফ নাৰ্ছ আৰু ভুক্তভোগীৰ জ্যেষ্ঠ ভাতৃৰ বিৰুদ্ধে ভাৰতীয় দণ্ডবিধিৰ লগতে POCSO আইনৰ অধীনত এফআইআৰ দাখিল কৰা হৈছে।
তদুপৰি কৰ্ণাটক আৱাসিক প্ৰতিষ্ঠান ছ’চাইটিয়ে বিদ্যালয়খনৰ চাৰিজন কৰ্মচাৰীক নিলম্বন কৰিছে। ইয়াৰ ভিতৰত বিদ্যালয়ৰ অধ্যক্ষ, হোষ্টেল ৱাৰ্ডেন আৰু দুজন শিক্ষক আছে। তেওঁলোকৰ বিৰুদ্ধে কৰ্তব্যৰ গাফিলতিৰ অভিযোগ উত্থাপন হৈছে।
