দক্ষিণ অসমৰ হাইলাকান্দি জিলাত আজি সংঘটিত হৈছে এক শোকাৱহ দুৰ্ঘটনা। কৰ্মৰত অৱস্থাতে এটা গভীৰ কুঁৱাত দুৰ্ঘটনাক্ৰমে পৰি যোৱাৰ ফলত প্ৰাণ হেৰুৱাইছে চাৰিগৰাকী শ্ৰমিকে।
আলগাপুৰ আৰক্ষী থানাৰ অন্তৰ্গত বাকৰিহাৱাৰত এটা ঘৰুৱা কুঁৱা পৰিষ্কাৰ কৰাৰ সময়ত এই শোকাৱহ ঘটনা সংঘটিত হয়।
শ্ৰমিক কেইবাগৰাকীয়ে অঞ্চলটোৰ এগৰাকী ব্যক্তিৰ ঘৰত কুঁৱা পৰিষ্কাৰ কৰাৰ সময়ত হঠাতে এগৰাকী শ্ৰমিক দুৰ্ঘটনাক্ৰমে কুঁৱাটোত বাগৰি পৰে।
শ্ৰমিকগৰাকীক বচাবলৈ চেষ্টা কৰোঁতেই আন তিনিগৰাকী শ্ৰমিকো কুঁৱাটোত বাগৰি পৰে বুলি এগৰাকী আৰক্ষী বিষয়াই জানিবলৈ দিয়ে।
ঘটনাৰ পাছতে এছডিআৰএফ বাহিনীৰ এটা দল উপস্থিত হয় আৰু কুঁৱাৰ পৰা মৃতদেহ কেইটা উদ্ধাৰ কৰে বুলি তেওঁ লগতে সদৰী কৰে।
ইফালে দুৰ্ঘটনাটোত আন এগৰাকী শ্ৰমিকো গুৰুতৰভাৱে আহত হয়। আঘাতপ্ৰাপ্ত শ্ৰমিকগৰাকীক লগে লগে শিলচৰ চিকিৎসা মহাবিদ্যালয়লৈ লৈ যোৱা হয়।
নিহত শ্ৰমিক কেইগৰাকীক আৰক্ষীয়ে ৰছিদ আহমেদ, নাজিম উদ্দিন, আবু চুহেল আৰু হাছিব উদ্দিন বুলি চিনাক্ত কৰিছে।
আনহাতে আহত সহিদ আহমেদ বৰ্তমান শিলচৰ চিকিৎসা মহাবিদ্যালয়তে চিকিৎসাধীন হৈ আছে বুলি বিষয়া গৰাকীয়ে জানিবলৈ দিয়ে।
