ভূপালৰ ভয়ংকৰ গেছ দুৰ্ঘটনাৰ আতংক পুনৰ ঘূৰি আহিল গুজৰাটত। ৰাসায়নিক কাৰখানাত বিষাক্ত গেছ নিৰ্গত হোৱাৰ ফলত কমেও ৪ জন শ্ৰমিকৰ মৃত্যু ঘটিছে। কেনেদৰে গেছ লিক হ’ল সেয়া এতিয়াও জানিব পৰা হোৱা নাই।
উল্লেখ্য যে তিনি বছৰ পূৰ্বে গুজৰাটৰ চুৰাটত গেছ নিৰ্গত হোৱাৰ ফলত ৬ জন লোকৰ মৃত্যু হৈছিল। প্ৰশ্ন উত্থাপন হৈছে যে কাৰখানাৰ পৰা কিয় এনেদৰে বিষাক্ত গেছ নিৰ্গত হৈছে।
গুজৰাটৰ বাহৰুচ জিলাৰ দাহেজত সংঘটিত হৈছে এই ঘটনা। আৰক্ষীৰ সূত্ৰ অনুসৰি গুজৰাট ফ্ল’ৰ’কেমিকেলছ লিমিটেড নামৰ এটা ৰাসায়নিক কাৰখানাত ঘটিছে এই ঘটনা। শনিবাৰে নিশা ১০ মান বজাত হঠাতে কাৰখানাটোৰ এটা মহলাৰ পাইপৰ পৰা গেছ নিৰ্গত হ’বলৈ ধৰে। সেই সময়ত কাৰখানাটোত ৪ জন শ্ৰমিক উপস্থিত আছিল। বিষাক্ত গেছত উশাহ লোৱাৰ পিছত সকলোৱে অসুস্থ হৈ পৰে।
শনিবাৰে নিশা কাৰখানাৰ ভিতৰতে অচেতন হৈ পৰে চাৰিওজন। খবৰ পোৱাৰ পিছতে মাজনিশা কাৰখানাটোত উদ্ধাৰ অভিযান আৰম্ভ হয়। তেওঁলোকক স্থানীয় ব্যক্তিগত চিকিৎসালয়ত ভৰ্তি কৰোৱা হয়। দেওবাৰে পুৱা তাতেই তিনিজন লোকৰ মৃত্যু হয়। চতুৰ্থ শ্ৰমিকজনে পুৱা ছয় বজাত শেষ নিশ্বাস ত্যাগ কৰে।
দাহেজ থানাৰ পৰিদৰ্শক বি এম পাটিদাৰে জনোৱা মতে, বৰ্তমান চাৰিজন লোকৰ মৰণোত্তৰ পৰীক্ষা চলি আছে। গেছ কেনেকৈ লিক হ’ল সেই বিষয়ে জানিবলৈ তদন্ত অব্যাহত আছে।
উল্লেখ্য যে যোৱা মাহত অন্ধ্ৰ প্ৰদেশৰ এটা ঔষধ নিৰ্মাণ কাৰখানাতো গেছ নিৰ্গত হৈছিল। বিষাক্ত বতাহ উশাহ লোৱাৰ পিছতে কাৰখানাটোৰ কমেও ২০ জন শ্ৰমিক অসুস্থ হৈ পৰে। পিছত এজনৰ মৃত্যু হয়। এইবাৰ এনে ঘটনা ঘটিল গুজৰাটত। কিয় বাৰে বাৰে কাৰখানাৰ পৰা বিষাক্ত গেছ লিক হৈ আছে? কাৰখানাসমূহত পৰ্যাপ্ত সুৰক্ষা ব্যৱস্থা গ্ৰহণ কৰা হৈছেনে? ২০২২ চনত চুৰাটত গেছ নিৰ্গত হোৱাৰ ফলত ৬ জন লোকৰ মৃত্যু হৈছিল। ফলত এই প্ৰশ্ন উত্থাপন হয় যে দেশজুৰি বিয়পি থকা ৰাসায়নিক কাৰখানাবোৰ দৰাচলতে নিৰাপদ নে?
