দেশৰ ৰাজনীতিত তোলপাৰ লগোৱা অযোধ্যাৰ ভূমি কেলেংকাৰীত এবাৰ নহয়, তিনিবাৰকৈ একেখিনি ভূমিকে বিক্ৰী কৰি কোটি কোটি টকা লুণ্ঠন কৰা হৈছে। মাত্ৰ ২ কোটি টকীয়া মাটি মূল্য হ’ল ১৮.৫ কোটি টকা।
এই বিস্ফোৰক অভিযোগ কৰিছে কংগ্ৰেছ নেত্ৰী প্ৰিয়ংকা গান্ধী বাদ্ৰাই।
এক সংবাদ মেলত কংগ্ৰেছ নেত্ৰীগৰাকীয়ে ভূমি কেলেংকাৰিৰ বিতং তথ্যসমূহ সদৰী কৰি কয় যে মাত্ৰ কেইটামান মিনিটৰ ভিতৰতে অযোধ্যা ৰাম মন্দিৰৰ কাষৰ মাটিৰ মূল্য ২ কোটিৰ পৰা ১৮.৫ কোটিলৈ বৃদ্ধি কৰা হৈছিল।
কেনেকৈ যোগী আদিত্যনাথৰ চৰকাৰী বিষয়া, বিজেপি নেতা আৰু তেওঁলোকৰ অঙহী বঙহীসকলে অবৈধভাৱে ভূমি ক্ৰয় কৰিছিল তাৰ তথ্য ফাদিল কৰিছে কংগ্ৰেছ নেত্ৰী প্ৰিয়ংকা গান্ধী বাদ্ৰাই।
প্ৰিয়ংকা গান্ধীয়ে সাংবাদিকক ভূমি বিক্ৰীৰ নথি পত্ৰ দেখুওৱাই কিদৰে ৰাম মন্দিৰৰ কাষৰ ২ কোটি টকীয়া ভূমি ১৮.৫ কোটি টকা বিক্ৰী কৰা হৈছিল সেয়াও সদৰী কৰিছে।
প্ৰিয়ংকা গান্ধীৰ অভিযোগ মতে ২ কোটি মূল্যৰ ৰাম মন্দিৰৰ ওচৰৰ মাটি দুবাৰকৈ বিক্ৰী কৰা হৈছিল। প্ৰথমবাৰ ৮ কোটি টকাত আৰু দ্বিতীয়বাৰ ১৮.৫ কোটি টকাত।
২০১৭ চনত এজন নিৰ্দিষ্ট ব্যক্তিক বিক্ৰী কৰা মাটি সেই ব্যক্তিজনে দুটা ভাগত বিক্ৰী কৰিছিল। ব্যক্তিজনে প্ৰথমে পোনপটীয়াকৈ ৰাম মন্দিৰ ন্যাসক ৮ কোটি বিক্ৰী কৰিছিল।
দ্বিতীয়বাৰ মাত্ৰ ১৯ মিনিটৰ পিছত ৰবি মোহন তিৱাৰী নামৰ এজন লোকক মাত্ৰ ২ কোটি টকাত বিক্ৰী কৰা হৈছিল। ইয়াৰ পাঁচ মিনিটৰ পিছত এইজন ৰবি মোহন তিৱাৰীয়ে সেই ২ কোটি টকীয়া মাটি ১৮.৫ কোটি টকাত ৰাম মন্দিৰ ট্ৰাষ্টক বিক্ৰী কৰিছে একেখিনি মাটি।
সাংবাদিকক চৰকাৰী তথ্য প্ৰদৰ্শন কৰি এইদৰে কয় প্ৰিয়ংকা গান্ধীয়ে। গান্ধীয়ে লগতে কয় যে উক্ত ভূমিৰ চৰকাৰী মূল্য মাত্ৰ ২ কোটিৰ টকাৰ সামান্য বেছি।
প্ৰথমে ৮ কোটি টকাত এজন ব্যক্তিক বিক্ৰী কৰাৰ মাত্ৰ পাঁচ মিনিটৰ ভিতৰতে পুনৰ অবৈধভাৱে একেখিনি মাটিকে ১৮.৫ কোটি টকাত বিক্ৰী কৰাটো ভূমি কেলেংকাৰি নহয় কি বুলিও প্ৰশ্ন কৰে কংগ্ৰেছ নেত্ৰী প্ৰিয়ংকা গান্ধীয়ে।
ইফালে এজন আৰএছএছৰ শীৰ্ষ সদস্য আৰু ৰাম মন্দিৰ সমিতিৰ ট্ৰাষ্টী আৰু অযোধ্যাৰ মেয়ৰ এই ভূমি চুক্তিৰ সাক্ষী বুলিও প্ৰিয়ংকা গান্ধীয়ে দাবী কৰিছে।
প্ৰিয়ংকা গান্ধীয়ে তথ্যসহ প্ৰমাণ কৰাৰ পিছতে অযোধ্যাৰ ৰাম মন্দিৰৰ ভূমি কেলেংকাৰি কিমান বৃহৎ আৰু ভয়াৱহ সেয়া স্পষ্ট হৈ পৰিছে। ৰাজ্য চৰকাৰৰ তথা ৰাজহ প্ৰশাসনৰ সহযোগ নাথাকিলে এই বিয়াগোম ভূমি কেলেংকাৰি সংঘটিত হোৱা সম্ভৱ নে? সমগ্ৰ দেশবাসীৰ মনত এতিয়া এই প্ৰশ্নই উদয় হৈছে।
