দু:সাহসিক ক্ৰীড়াৰ প্ৰতি নিচা থকা আৰু জুবিন গাৰ্গৰ অনুৰাগীসকলৰ বাবে এটা ভাল খৱৰ। অহা শনিবাৰেই আপুনি ল’ব পাৰিব এই শিহৰণকাৰী অভিজ্ঞতাৰ আনন্দ।
অসমীয়া চলচ্চিত্ৰ ‘মিছন চাইনা’ৰ অৱলম্বনত নিৰ্মিত উত্তৰ-পূবৰ প্ৰথম চিনেমেটিক থ্ৰি-ডি এণ্ড্ৰইড গেমৰ জৰিয়তে ভাৰত-চীন সীমান্তৰ এক শিহৰণকাৰী উদ্ধাৰ অভিযানৰে ভাৰ্ছুৱেল পৃথিৱীৰ মাজত ডুব যাব পাৰিব। দ্য টেলিগ্ৰাফ কাকত প্ৰকাশ পাইছে এই বাতৰি।
শনিবাৰে এই গেমটো গুগল প্লে’ ষ্ট’ৰত উপলব্ধ হ’ব। ২০১৭ চনৰ উগ্ৰপন্থীৰ সৈতে মোকাবিলা কৰা চোৰাংচোৱাৰ থ্ৰিলাৰে দৰ্শকক, বিশেষকৈ যুৱ মনক কল্পনাৰ মাজলৈ লৈ যাব। ইয়াত এটা মোবাইল গেমৰ সম্ভাৱনাৰ প্ৰতি লক্ষ্য ৰাখি প্ৰমোশ্যন কৰা হৈছে।
পত্নী গৰিমা শইকীয়া সহ প্ৰযোজক হিচাপে থকা ছবিখনৰ পৰিচালক হিচাপেও আছে জুবিন গাৰ্গ।
এই গেমটো নিৰ্মাণ কৰি উলিওৱাৰ বাবে শিৱসাগৰ কমাৰ্চ কলেজৰ কম্পিউটাৰ স্নাতক পাঠ্যক্ৰমৰ ছাত্ৰ অংশুমান গগৈ আৰু তেওঁৰেই সতীৰ্থ অংকুৰজ্যোতি হাতীবৰুৱাই যথেষ্ট অহোপুৰুষাৰ্থ কৰিছে।
অংশুমানে জানিবলৈ দিয়ে যে তেওঁ মিছন চাইনাৰ স্মৃতি সংৰক্ষণ কৰি ৰখাৰ সহায় কৰিবলৈ কিবা এটা কৰাৰ কথা চিন্তা কৰিছিল।
ছবিখনত জুবিন গাৰ্গে নায়ক কৰ্ণেল গোস্বামীৰ ভূমিকাত অৱতীৰ্ণ হৈছে আৰু যিয়ে তেওঁৰ তিনিজন বিশ্বস্ত সহযোগী সৈনিকৰ সৈতে ভাৰত-চীন সীমান্তত ৰাজনৈতিক কাৰণত অপহৰণ কৰি নিয়া এগৰাকী কণমানি ছোৱালীক উদ্ধাৰ কৰিবলৈ অভিযান চলায়।
‘’মই অভিলেখ সৃষ্টিকাৰী অসমীয়া চলচ্চিত্ৰখন দুবাৰ চাইছো আৰু ইয়াৰ কাৰিকৰী প্ৰদৰ্শন তথা কাহিনীৰ ক্ষিপ্ৰ গতি ভাল পাইছিলো। মই ভাল অসমীয়া ছবি পছন্দ কৰো আৰু জুবিন দাক লগ ধৰি নতুন কিবা এটা কৰাৰ কথা আলোচনা কৰাৰ কথা ভাৱিছিলো যিটোৱে মিছন চাইনাক সংৰক্ষণ কৰাত সহায় কৰিব পাৰে,’’-অংশুমানে কয়।
তেওঁ লগতে কয়,’’আমি শিৱসাগৰত জুবিনদাক লগ কৰি আমি নিৰ্মাণ কৰিব খোজা গেমটোৰ এটা ডেম’ দেখুৱাইছিলো। তেওঁ আমাৰ কামটো ভাল পাইছিল আৰু আমাক নিষ্ঠাৰে কাম কৰিবলৈ উৎসাহিত কৰিছিল। ভিডিঅ’ গেমটো মই, অংকুৰজ্যোতি আৰু ৰিতপৰ্ণ বৰাৰ এটা টীম ৱৰ্কৰ ফল। ৰিতুপৰ্ণই গেমটোৰ প’ষ্টাৰ আৰু টীজাৰ ডিজাইন কৰিছে।‘’
ইয়াৰ জৰিয়তে জুবিন গাৰ্গেও ভিডিঅ’ গেমত ৰূপায়িত হোৱা প্ৰথমগৰাকী শিল্পী হিচাপে পৰিচিত হ’ব।
বিভিন্ন প্ৰত্যাহ্বানলমূহ পূৰণ কৰিবলৈ পৰ্যায়ক্ৰমে মিছন থাকিব। কৰ্ণেল গোস্বামীয়ে নায়কৰ ৰূপত থাকিব। গেমটোত চলচ্চিত্ৰখনৰো কেইবাটাও দৃশ্য থাকিব।
ইয়াৰ মুখ্য চৰিত্ৰসমূহৰ কেইটামান হৈছে আৰক্ষী মহা পৰিদৰ্শক জি পি শৰ্মা, লামা, ড০ গৰিমা আৰু য়ানকি।
জুবিনে শিৱসাগৰৰ জোনছকায়া ৰিজৰ্টত চূড়ান্ত গেমৰ ফাইলটো খেলি গেমটো মুকলি কৰিব আৰু শনিবাৰৰ পৰা গুগল প্লে’ ষ্ট’ৰত গেমটো উপলব্ধ হ’ব।
