ভাৰতৰ প্ৰথমটো বিশ্বমানৰ ৰে’লৱে ষ্টেশ্যনৰ মৰ্যাদা লাভৰ দিশে অগ্ৰসৰ হৈছে গুজৰাটৰ গান্ধীনগৰ ৰে’লৱে ষ্টেশ্যন।
দেশৰ প্ৰথমটো ৰে’লৱে ষ্টেশ্যনৰ ট্ৰেকৰ ওপৰত নিৰ্মাণ কৰা হৈছে এই পঞ্চতাৰকাযুক্ত হোটেল। উল্লেখ্য যে লীলা গ্ৰুপে গান্ধীনগৰ ৰে’লৱে ষ্টেশ্যনৰ ট্ৰেকৰ ওপৰত নিৰ্মাণ কৰা এই পঞ্চতাৰকাযুক্ত হোটেলখন চলিত বৰ্ষৰ ডিচেম্বৰ মাহত সম্পূৰ্ণ হৈ উঠিব বুলি জনাইছে ৰে’লৱে ব’ৰ্ডৰ চেয়াৰমেন ভি কে যাদৱে।
চেয়াৰেমন যাদৱে লগতে জনাইছে যে গান্ধীনগৰ ৰে’লৱে ট্ৰেকৰ ওপৰত নিৰ্মিত বিশ্বমানৰ এই পঞ্চতাৰকাযুক্ত হোটেলখন দেশৰ ভিতৰতে প্ৰথম আৰু ইয়াত পঞ্চতাৰকা হোটেলৰ সকলো ধৰণৰ সা-সুবিধাই উপলব্ধ হ’ব।
তিনিটা টাৱাৰ সংলগ্ন উক্ত পঞ্চতাৰকাযুক্ত হোটেলখনত মুঠ ৩০০ টা কোঠা থাকিব। অতি উচ্চমানৰ অত্যাধুনিক প্ৰযুক্তিৰে নিৰ্মিত হোটেলখনৰ তলৰ ৰে’লৱে ট্ৰেকেৰে ৰেইল চলি গ’লেও কোনোধৰণৰ কম্পন অনুভূত নহ’ব বুলিও জনাইছে চেয়াৰমেন যাদৱে।
তিনিটা টাৱাৰ সংলগ্ন হৈ থকা হোটেলখনৰ গ্ৰাউণ্ড ফ্ল’ৰৰ উচ্চতা হৈছে ২২ মিটাৰ। ইয়াৰ তিনিটা টাৱাৰত ক্ৰমে ৬, ৮ আৰু ১০ টা মহলা থাকিব, যিটো হ’ব গান্ধীনগৰ চহৰৰ আটাইতকৈ উচ্চ আট্টালিকা।
অত্যাধুনিকভাৱে নিৰ্মিত উক্ত পঞ্চতাৰকাযুক্ত হোটেলখনত যাত্ৰীসকলৰ বাবে শ্ব’পাৰ শ্ব’প, বিগ বজাৰ আদিৰ দৰে বহুজাতিক কোম্পানীৰ শ্ব’পিং ম’ল, ফুড ক’ৰ্ট আদিয়ো উপলব্ধ হ’ব। আৰু একেলগে ৬০০ যাত্ৰীয়ে জিৰণি ল’ব পৰাকৈ আসনৰ ব্যৱস্থাও থাকিব।
বিমানবন্দৰৰ আৰ্হিত নিৰ্মিত এই পঞ্চতাৰকাযুক্ত হোটেলখনে ভাৰতীয় ৰেইল বিভাগলৈ যথেষ্ট পৰিমাণৰ ৰাজহ আয় কৰিব বুলি ধাৰণা কৰিছে ৰেইল কৰ্তৃপক্ষই।
উল্লেখ্য যে অত্যাধুনিক বিমানবন্দৰৰ আৰ্হিত নিৰ্মিত ভাৰতীয় ৰে’লৱেৰ বিশ্বমানৰ এই অভিলাষী প্ৰকল্পটো ভাৰতীয় ৰে’লৱে ষ্টেশ্যন উন্নয়ন নিগমৰ অধীনত লীলা গ্ৰুপে নিৰ্মাণ কৰিছে আৰু গান্ধীনগৰ ৰে’লৱে আৰু নগৰ উন্নয়ন নিগম লিমিটেড আৰু গুজৰাট চৰকাৰে সহযোগ কৰিছে।
