যোৱা দুটা সপ্তাহ ধৰি শুং-সূত্ৰ নাইকীয়া হৈ থকা আইকন কমাৰ্চ কলেজৰ সদ্য নিলম্বিত প্ৰবক্তা পাপৰি বেনাৰ্জীক গুৱাহাটী উচ্চ ন্যায়ালয়ে আজি অন্তৰৱৰ্ত্তীকালিন অগ্ৰীম জামিন প্ৰদান কৰিছে।
উল্লেখযোগ্য যে যোৱা ১৪ ফেব্ৰুৱাৰিত পুলৱামাত সংঘটিত সন্ত্ৰাসবাদী আক্ৰমণৰ পাছত চ’চিয়েল মিডিয়াত দিয়া এক প’ষ্টক কেন্দ্ৰ কৰি প্ৰবক্তাগৰাকী বিতৰ্কৰ আৱৰ্তত সোমাই পৰিছিল। ইয়াৰ পাছতেই তেওঁ যোৱা ১৭ ফেব্ৰুৱাৰিৰ পৰা সন্ধানহীন হৈ আছে।
ফে’চ বুকত আপলোড কৰা উক্ত প’ষ্টৰ জৰিয়তে ভাৰতীয় সেনাক অপমান কৰাৰ অভিযোগত তেওঁক আইকন কমাৰ্চ কলেজে নিলম্বিত কৰিছিল।
সন্ধানহীন হোৱাৰ এদিন পূৰ্বে অৰ্থাৎ ১৬ ফেব্ৰুৱাৰিত মহানগৰীৰ চানমাৰি আৰক্ষীয়ে তেওঁক মাতি নি সোধা-পোছাও কৰিছিল। লগতে তেওঁৰ মোবাইল ফোনটো পৰীক্ষাৰ বাবে আৰক্ষীয়ে ৰাখি থৈছিল।
পৰৱৰ্তী সময়ত আৰক্ষীয়ে চানমাৰি থানাত ১৩২/১৩ নম্বৰত ভাৰতীয় দণ্ড বিধিৰ ৫০৫ আৰু তথ্য আৰু প্ৰযুক্তি আইনৰ ৬৬ নম্বৰ ধাৰাত এটা নিজাবৱীয়া গোচৰ ৰুজু কৰি ১৮ ফেব্ৰুৱাৰিত তেওঁক পুনৰ হাজিৰ হ’বলৈ নিৰ্দেশ দিছিল। কিন্তু তেওঁ আজি পৰ্যন্ত থানাত হাজিৰ হোৱা নাই।
পাপৰি বেনাৰ্জীৰ পিতৃ বিমল বেনাৰ্জীয়ে নৰ্থ-ইষ্ট নাওক কিছুদিন পূৰ্বে জানিবলৈ দিছিল যে ঘৰৰ পৰা নাইকীয়া হোৱাৰ পাছত পৰিয়ালৰ লগত তেওঁৰ কোনোধৰণৰ যোগাযোগ হোৱা নাই। অৱশ্যে তেওঁ পুনৰ ঘৰলৈ উভতি আহিব বুলি দেউতাকে আশা প্ৰকাশ কৰিছিল।
ইপিনে, আজি চানমাৰি আৰক্ষীৰ তদন্তকাৰী বিষয়াগৰাকীয়ে পাপৰি বেনাৰ্জীয়ে শেহতীয়াভাৱে দিল্লীত থকাৰ তথ্য লাভ কৰা বুলি আমাক জানিবলৈ দিয়ে।
