আন্দোলনক বিভাজন কৰিবলৈ কৰা ষড়যন্ত্ৰক গৰিহণা গুৱাহাটী বিশ্ববিদ্যালয় শিক্ষক সংস্থাৰ
CAA-বিৰোধী আন্দোলনক বিভাজন কৰিবলৈ শাসক দল আৰু ন্যস্তস্বাৰ্থজড়িত মহলে চলোৱা প্ৰচেষ্টাক সমালোচনা কৰি এই পক্ষবোৰক সতৰ্ক কৰি দিছে গুৱাহাটী বিশ্ববিদ্যালয় শিক্ষক সংস্থাই।
৩০ ডিচেম্বৰত সংবাদ সংবাদ মাধ্যমলৈ প্ৰেৰণ কৰা এটা বিবৃতিৰ জৰিয়তে সংস্থাই এনে বিভ্ৰান্তি আৰু বিভাজনমূলক প্ৰৰোচনাৰ পৰা আঁতৰি থাকি শান্তিপূৰ্ণ গণতান্ত্ৰিক আন্দোলন আগুৱাই লৈ যাবৰ বাবে অসমৰ হিতাকাংক্ষী জনসাধাৰণক আহ্বান জনায়।
“গুৱাহাটী বিশ্ববিদ্যালয় শিক্ষক সংস্থাই গভীৰভাৱে বিশ্বাস কৰে যে এটা গণতান্ত্ৰিক জাতীয় আন্দোলনক বিপথে পৰিচালিত কৰিবৰ বাবে চলোৱা যিকোনো প্ৰচেষ্টাই অনাহুত পৰিস্থিতিৰহে সৃষ্টি কৰিব”, বিবৃতিটোৰ এটা অংশত কোৱা হয়।
বিবৃতিটোৰ জৰিয়তে সংস্থাই অসমৰ জাতীয় জাগৰণৰ প্ৰতি সন্মান জনাই তৎকালে নাগৰিকত্ব সংশোধনী আইন ২০১৯ প্ৰত্যাহাৰ কৰিবলৈ সজোৰে দাবী উত্থাপন কৰে।
আনহাতে আজি উচ্চ শিক্ষা সঞ্চালকালয়ে শিক্ষকসকলক চৰকাৰক সমালোচনাৰ পৰা বিৰত থাকিবলৈ সকীয়াই দি জাননী দিয়াক মত প্ৰকাশৰ স্বাধীনতাক খৰ্ব কৰাৰ চেষ্টা বুলি কোৱা হয়।
বিবৃতিটোত কোৱা হয় যে গণতান্ত্ৰিক দেশত বাক স্বাধীনতা সংবিধানপ্ৰদত্ত এটা স্বাধীনতা। যি সময়ত দেশৰ শিক্ষিত আৰু সচেতন মহলৰ ভূমিকা গুৰুত্বপূৰ্ণ, সেই সময়তে চৰকাৰে শিক্ষক আৰু কৰ্মচাৰীসকলৰ বাক স্বাধীনতা খৰ্ব কৰা কাৰ্য্যৰ বিৰোধিতা কৰে সংস্থাই। গণতন্ত্ৰৰ সুৰক্ষাৰ স্বাৰ্থতে এই জাননী প্ৰত্যাহাৰৰ দাবী তোলে শিক্ষক সংস্থাটোৱে।
চৰকাৰৰ কামকাজত বিস্ময় প্ৰকাশ কৰি বিবৃতিটোত কোৱা হয়, CAA-বিৰোধী আন্দোলনত ৫গৰাকী যুৱক চৰকাৰী হিংস্ৰতাৰ বলি হৈ মৃত্যুবৰণ কৰাৰ পিছত চৰকাৰে শান্তি সমদল উলিওৱাটো আশ্চৰ্য্যকৰ। এনে কাৰ্য্যক গণতান্ত্ৰিক নীতি আৰু নৈতিকতাৰ পৰিপন্থী আখ্যা দিয়ে শিক্ষক সমাজে।