‘৬ জি’ ইণ্টাৰনেটৰ আন্তঃগাঁথনি নিৰ্মাণ কৰা বিশ্বৰ প্ৰথমটো কোম্পানী হ’ব জিঅ’ – মুকেশ আম্বানী
সোমবাৰে ৰিলায়েন্স ইণ্ডাষ্ট্ৰীজৰ ৪৬ সংখ্যক বাৰ্ষিক সাধাৰণ সভা অনুষ্ঠিত হয়। সেই সভাত কোম্পানীৰ অধ্যক্ষ মুকেশ আম্বানীয়ে কেইবাটাও পৰিকল্পনাৰ কথা ঘোষণা কৰে।
আম্বানীয়ে কয় যে জিঅ’ প্লেটফৰ্মে ৬জি ক্ষমতাৰ ক্ষেত্ৰত বিশ্বক আগুৱাই নিব পৰাকৈ পৰিকল্পনা কৰিছে। লগতে তেওঁ কয় যে ৰিলায়েন্স জিঅ’ই বিশ্বৰ প্ৰথমটো কোম্পানী হিচাপে পৰৱৰ্তী প্ৰজন্মৰ নেটৱৰ্ক গঢ়ি তুলিব।
আম্বানীয়ে জিঅ’ প্লেটফৰ্মৰ উৎপত্তিৰ পৰা টেলিকমিউনিকেচন অপাৰেটৰ হিচাপে বৰ্তমানৰ প্ৰযুক্তি উদ্যোগলৈ ৰূপান্তৰিত হোৱাৰ অৱস্থাৰ ওপৰত আলোকপাত কৰে। তেওঁৰ সংগঠনৰ ৰূপান্তৰ কেৱল ৰাষ্ট্ৰীয় ক্ষেত্ৰখনতে সীমাবদ্ধ নাথাকিব বুলি তেওঁ আশাবাদী।
জিঅ’ প্লেটফৰ্মে নিজৰ ‘মেড ইন ইণ্ডিয়া’ প্ৰযুক্তি আন্তঃৰাষ্ট্ৰীয় বজাৰতো সম্প্ৰসাৰণ কৰিবলৈ সাজু বুলিও তেওঁ কয়।
মুকেশ আম্বানীয়ে কয় যে জিঅ’ৰ ৫জি সম্প্ৰসাৰণ স্থানীয়ভাৱে বিকশিত ৫ জি ষ্টেকত নিৰ্মিত, য’ত ষ্টেণ্ডএল’ন ৫জি আৰ্কিটেকচাৰ, কেৰিয়াৰ এগ্ৰিগেচন, নেটৱৰ্ক স্লাইচিং আৰু এডভান্সড আৰ্টিফিচিয়েল ইনটেলিজেন্স/মেচিন লাৰ্নিং (এআই/এমএল)ৰ দৰে প্ৰযুক্তি অন্তৰ্ভুক্ত কৰা হৈছে।