আই আই টি গুৱাহাটীৰ গৱেষকসকলে অহাইঅ’ ষ্টেট ইউনিভাৰ্চিটিৰ সহযোগত এটা অভিনৱ চেন্সৰ তৈয়াৰ কৰিছে, যিয়ে পানীৰ তৰংগৰ জৰিয়তে বাক্য চিনাক্ত কৰি কণ্ঠৰ অক্ষমতা থকা লোকসকলক যোগাযোগত সহায় কৰিব পাৰে। এই চেন্সৰে উশাহৰ জৰিয়তে পানীৰ পৃষ্ঠত সৃষ্টি হোৱা সৰু তৰংগ ধৰি বাক্য হিচাপে ব্যাখ্যা কৰে।
গৱেষকসকলে জানিবলৈ দিয়া মতে, এই চেন্সৰটো পৰিবাহী, ছিদ্ৰযুক্ত স্পঞ্জৰ পৰা তৈয়াৰ কৰা হৈছে আৰু ইয়াক বায়ু-পানীৰ পৃষ্ঠৰ ঠিক তলত ৰখা হয়। ই উশাহৰ বায়ুৰ পৰা হোৱা সূক্ষ্ম তৰংগ ধৰি বৈদ্যুতিক সংকেতলৈ ৰূপান্তৰিত কৰে। এই সংকেতসমূহ সঠিকভাৱে ব্যাখ্যা কৰিবলৈ কনভল্যুচনেল নিউৰেল নেটৱৰ্ক (CNN) নামৰ গভীৰ শিক্ষণ প্ৰযুক্তিৰ ব্যৱহাৰ কৰা হৈছে।
এই চেন্সৰৰ বিশেষত্ব হ’ল ই স্বয়ংক্ৰিয় আৰু সংস্পৰ্শবিহীনভাৱে কণ্ঠস্বৰ চিনাক্ত কৰিব পাৰে, যাৰ ফলত কথা ক’ব নোৱাৰা লোকসকলে শব্দ উৎপন্ন নকৰাকৈ দূৰৰ পৰা ডিভাইচৰ সৈতে যোগাযোগ কৰিব পাৰে। সাধাৰণ কণ্ঠ-ভিত্তিক যোগাযোগ ব্যৱস্থা কণ্ঠৰ অক্ষমতা থকা লোকৰ বাবে উপযোগী নহয়। এই চেন্সৰে উশাহৰ বায়ুৰ পৰা সৃষ্টি হোৱা পানীৰ তৰংগৰ জৰিয়তে এই সমস্যাৰ সমাধান কৰিছে।
অধ্যাপক উত্তম মান্নাই কয়, “এই চেন্সৰে বায়ু-পানীৰ পৃষ্ঠত উশাহৰ পৰা সৃষ্টি হোৱা তৰংগ নিৰীক্ষণ কৰি কণ্ঠ চিনাক্ত কৰে। কণ্ঠৰ অক্ষমতা থকা লোকৰ বাবে ই এক ব্যৱহাৰিক যোগাযোগৰ সমাধান হ’ব পাৰে।”
লেবত এই প্ৰ’ট’টাইপ তৈয়াৰ কৰিবলৈ খৰচ হৈছে প্ৰায় ৩,০০০ টকা। গৱেষকসকলে বাণিজ্যিক উৎপাদনৰ বাবে উদ্যোগৰ সৈতে অংশীদাৰিত্বৰ সন্ধান কৰি আছে, যাৰ ফলত চূড়ান্ত সামগ্ৰীৰ খৰচ কমিব পাৰে। এই চেন্সৰৰ এআই-চালিত ব্যাখ্যা আৰু হেণ্ডছ-ফ্ৰী নিয়ন্ত্ৰণৰ সুবিধাই ইয়াক বিশেষ কৰি তুলিছে। বৰ্তমান এই যন্ত্ৰটোৱে ক্লিনিকেল পৰীক্ষণৰ অপেক্ষাত আছে।
