যোৱা ২ জানুৱাৰীত গোলাঘাটৰ পোৰাবাংলাত আৰক্ষীৰ হাতত আহত হোৱা চাহ শ্ৰমিকক আজি পৰ্যন্ত কোনোধৰণৰ ক্ষতিপূৰণ নিদিয়াৰ প্ৰতিবাদত চাহ শ্ৰমিক মুক্তি সংগ্ৰাম সমিতিয়ে ৮ জানুৱাৰীৰ দিনা ১২ ঘন্টাৰ বাবে গোলাঘাট জিলা বন্ধৰ ঘোষণা কৰিছে ৷
সংবাদ মাধ্যমলৈ প্ৰেৰিত এক প্ৰেছ বিজ্ঞপ্তিত সংগঠনটোৰ কেন্দ্ৰীয় সমিতিৰ সম্পাদক মুকেশ জাল আৰু কাৰ্যকৰী সভাপতি অমিত নাগে জনাইছে যে বগীঢলা চাহ বাগিচাৰ নিৰীহ শ্রমিক ক্রমে জামুন তেলী, জগদীশ তাঁতী আৰু ৰণী কমাৰক গোলাঘাট প্রশাসনে গ্রেপ্তাৰ কৰাৰ প্রতিবাদত শ্রমিক কেইজনৰ মুক্তিৰ দাবীত পথ অৱৰোধ কৰা হৈছিল।
উক্ত প্রতিবাদী কাৰ্যসূচীত ৩২ জন শ্রমিক গুৰুতৰভাৱে আহত হৈছিল আৰু আহত হোৱা শ্ৰমিকসকলক ততাতৈয়াকৈ নুমলীগড় তেলশোধানাগাৰ বিবেকানন্দ চিকিৎসালয়লৈ নি চিকিৎসা প্রদান কৰা হৈছিল। গুৰুতৰভাৱে আহত হোৱা শ্ৰমিকসকলৰ চিকিৎসাৰ সম্পূর্ণ খৰচ তথা ক্ষতিপূৰণ আদায়ৰ দাবীত গোলাঘাট জিলা মৰঙী ৰাজহ চক্ৰ বিষয়াক এখন স্মাৰক পত্র প্রদান কৰা হৈছিল।
উক্ত স্মাৰক পত্ৰত তৃতীয় পক্ষৰ দ্বাৰা সংঘটিত হোৱা উক্ত ঘটনাটোৰ এক উচিত তদন্ত তথা শ্ৰমিক সকলৰ সম্পূর্ণ চিকিৎসা তথা ক্ষতিপূৰণ দিবলৈ দাবী কৰা হৈছিল৷ কিন্তু আজি পর্যন্ত গোলাঘাট জিলাৰ উপায়ুক্ত গৌৰৱ বাথ্ৰাই এই ক্ষেত্ৰত কোনোধৰণৰ পদক্ষেপ গ্ৰহণ নকৰাত অহা ৮ জানুৱাৰীৰ পুৱা ৫ বজাৰ পৰা সন্ধিয়া ৫ বজালৈ গোলাঘাট জিলা বন্ধ ঘোষণা কৰাৰ কথা বিবৃতিটোত উল্লেখ কৰা হৈছে।
বিবৃতিটোত লগতে গোলাঘাট জিলাৰ সকলো চাহ বাগিচাৰ শ্ৰমিককে বগীঢলা চাহ বাগিছাৰ ঘটনাৰ প্রতি লক্ষ্য ৰাখি ৮ জানুৱাৰীৰ বন্ধ সর্বাত্মকভাৱে সফল কৰি তুলিবলৈ চাহ শ্ৰমিক মুক্তি সংগ্ৰাম সমিতিয়ে আহ্বান জনাইছে।
