চিকিৎসক-স্বাস্থ্যকৰ্মীক আক্ৰমণৰ ঘটনা প্ৰতিবাদত গোলাঘাটতো চিকিৎসক সন্থাৰ প্ৰতিবাদ
ফটো: নৰ্থইষ্ট নাও।
সমগ্র দেশৰ লগতে আজি গোলাঘাটতো চিকিৎসকসকলে পালন কৰিলে কৰ্মবিৰতি কাৰ্যসূচী।
দেশৰ ভিতৰতে বৃহৎ চিকিৎসক সন্থা ভাৰতীয় চিকিৎসাসেৱা সন্থাৰ আহ্বান মৰ্মে এই প্ৰতিবাদ সাব্যস্ত কৰে গোলাঘাটৰ চিকিৎসা কৰ্মী সকলে।
চৰকাৰী বা বেচৰকাৰী সকলো চিকিৎসাকৰ্মীকে সামৰি লোৱা এই সন্থাই আজি এই প্ৰতিবাদী কাৰ্যসূচী গ্ৰহণৰ মূল কাৰণ হৈছে বৰ্তমান বৃদ্ধি পোৱা চিকিৎসক নিগ্ৰহৰ ঘটনা।
স্বাস্থ্যকৰ্মীৰ ওপৰত শাৰীৰিকভাৱে নিৰ্যাতন কৰি আইন হাতত তুলি লোৱা একাংশ লোকৰ বিৰুদ্ধে এই প্ৰতিবাদ অসম চিকিৎসা সেৱা সন্থা গোলাঘাট শাখাৰ।
গোলাঘাটস্থিত শ্বহীদ কুশল কোঁৱৰ অসামৰিক চিকিৎসালয়ৰ সন্মুখত ক’লা বেজ পৰিধান কৰি আধা ঘন্টীয়া কৰ্মবিৰতি পালনৰে প্ৰতিবাদ সাব্যস্ত কৰে প্ৰতিবাদকাৰীসকলে।
স্বাস্থ্য কৰ্মীৰ নিৰাপত্তা সুনিশ্চিত কৰা আৰু চিকিৎসক বা চিকিৎসাকৰ্মীৰ বিৰুদ্ধে হিংসা বন্ধ কৰাৰ দাবী জনায় প্ৰতিবাদকাৰীসকলে।