লোকে লোকাৰণ্য ঢকুৱাখানা : আজিৰে পৰা টিএমপিকেৰ সোণালী জয়ন্তীৰ দ্বিতীয় পৰ্যায়ৰ কাৰ্যসূচী আৰম্ভ
শনিবাৰ পৰা লখিমপুৰ জিলাৰ ঢকুৱাখানাত আৰম্ভ হৈছে টাকাম মিছিং পৰিন কেবাং(টিএমপিকে)ৰ সোণালী জয়ন্তীৰ দ্বিতীয় পৰ্যায়ৰ উদযাপন অনুষ্ঠান।
ঢকুৱাখানাৰ মাতমৰাৰ সদৌ অসম মিৰি উচ্চ মাধ্যমিক বিদ্যালয়ৰ খেলপথাৰত দুদিনীয়াকৈ অনুষ্ঠিত হোৱা টিএমপিকেৰ দ্বিতীয় পৰ্যায়ৰ এই সোণালী জয়ন্তী অনুষ্ঠানৰ আজি প্ৰথম দিনা ছাত্ৰ সংগঠনটোৰ পতাকা উত্তোলন কৰে কেন্দ্ৰীয় সাধাৰণ সম্পাদক তিলক দলেই।
প্ৰতিনিধি শিবিৰ মুকলি কৰে অভ্যৰ্থনা সমিতিৰ সম্পাদক ইন্দ্ৰ কুমাৰ চুংক্ৰাঙে।
মিছিং জনগোষ্ঠীৰ বিভিন্ন সাংস্কৃতিক উপাদানসমূহ প্ৰদৰ্শনৰ বাবে নিৰ্মাণ কৰি তোলা প্ৰদৰ্শনী শিবিৰ মুকলি কৰে লখিমপুৰ জিলাৰ উপায়ুক্ত ডাঃ জীৱন বৰুৱাই।
সোণালী জয়ন্তী উদযাপনস্থলীত প্ৰতিনিত্বমূলকভাৱে সাজি উলিওৱা মিছিং জনগোষ্ঠীয় গাঁওখন উন্মোচন কৰে লখিমপুৰ জিলাৰ আৰক্ষী অধীক্ষক লংনিত টেৰণে।
ইফালে মইনাপাৰা জংকী পানৈ উচ্চ মাধ্যমিক বিদ্যালয়ৰ পৰা গোগামুখলৈ টিএমপিকেৰ সদস্যসকলে উলিওৱা বিশাল মটৰ চাইকেল ৰেলী মুকলি কৰে টিএমপিকেৰ সম্পাদক তিলক দলেই।
মটৰ চাইকেল ৰেলী মুকলি কৰি যোৱা বছৰ পঞ্চাশ বছৰে টিএমপিকেই মিছিং জনগোষ্ঠীটোৰ উন্নয়ন আৰু স্বাধিকাৰ বাবে যুঁজি আহিছে বুলি মন্তব্য কৰে টিএমপিকেৰ সাধাৰণ সম্পাদক তিলক দলেই।
কাইলৈ দ্বিতীয় দিনাৰ আন্তৰ্জাতিক খ্যাতিসম্পন্ন পৰিৱেশকৰ্মী পদ্মশ্ৰী প্ৰাপক যাদৱ পায়েঙে মুখ্য অতিথিৰূপে উপস্থিত থাকিব।
উল্লেখ্য যে টিএমপিকেৰ সোণালী জয়ন্তী প্ৰথম পৰ্যায়ৰ কাৰ্যসূচীৰ যোৱা জানুৱাৰিৰ মাহত জোনাইত শুভাৰম্ভ কৰা হৈছিল।