ৰাষ্ট্ৰীয় দূৰসংযোগ সংস্থা BSNL-এ চুক্তি অনুসৰি ৰিলায়েন্স জিঅ‘ক পৰিশোধ কৰিবলগীয়া ধন আদায় নকৰাৰ বাবে চৰকাৰে প্ৰায় ১,৭৫৭ কোটি ৫৬ লাখ টকাৰ লোকচানৰ সন্মুখীন হয়। কেগৰ প্ৰতিবেদনত পোহৰলৈ অহিছে এই তথ্য।
কেগৰ প্ৰতিবেদন আনুসৰি ২০১৪ চনৰ মে’ৰ পৰা ২০২৪ চনৰ মাৰ্চলৈ BSNL-এ ৰিলায়েন্স জিঅ‘ৰ সৈতে হোৱা চুক্তি মৰ্মে পি আই এচৰ বাবে বিল জমা কৰা নাছিল। ইয়াৰোপৰি, BSNL-এ টি আই পি (Telecom Infrastructure Providers)ক দিয়া ৰেভিনিউ শ্বেয়াৰৰ পৰা লাইচেন্সৰ বাবদ পৰিশোধ কৰিবলগীয়া অংশ কাটি নোলোৱাৰ বাবে আন ৩৮ কোটি ৩৬ লাখ টকাৰ লোকচানৰ সন্মুখীন হৈছে।
বিএছএনএলয়ে এম এচ এ (Master Service Agreement)ৰ নীতি পালন নকৰি ৰিলায়েন্স জিঅ‘ক বেছি টেকন‘লজি ব্যৱহাৰৰ বাবে পৰিশোধিত ধন আদায় নিদিয়াৰ বাবে এই ডাঙৰ অৰ্থনৈতিক ক্ষতি হয়। লগতে, পি আই এচ(Passive Infrastructure Sharing) চাৰ্জ কমকৈ আদায় কৰাৰো প্ৰমাণ পোৱা গৈছে।
ৰাষ্ট্ৰীয় দূৰসংযোগ সংস্থাটোৰ এই গাফিলতিৰ বাবে চৰকাৰী ভঁৰাললৈ জিএছটি সহ ২৯ কোটি টকা ৰাজহ হেৰাইছে বুলিও কেগৰ প্ৰতিবেদনত উল্লেখ কৰা হৈছে। অৱশ্যে এইক্ষেত্ৰত ৰাষ্ট্ৰীয় দূৰসংযোগ সংস্থাটোৰ ফালৰ পৰা কোনো প্ৰতিক্ৰিয়া অহা নাই।
