পথ দুৰ্ঘটনাত নিহত হোৱা কাজিৰঙাৰ গৃহৰক্ষী জোৱান জয়কান্ত পেগুৰ বিধৱা পত্নী দীপালি পেগুক গ্ৰেচুইটিৰ ৩ লাখ টকাৰ চেক প্ৰদান কৰিছে মন্ত্ৰী অতুল বৰাই।
বোকাখাতৰ আৱৰ্ত ভৱনত মঙলবাৰে পেগুক আনুষ্ঠানিকভাৱে এই চেক প্ৰদান কৰা হয়। বেচৰকাৰী সংস্থা ডব্লিউ ডব্লিউ এফ (World wildlife fund)ৰ উদ্যোগত এই সাহায্য প্ৰদান কৰা হৈছে৷
বোকাখাতৰ আমটেঙা গাঁৱৰ পেগুৰ যোৱা ২২ এপ্ৰিলত গুৱাহাটী চিকিৎসা মহাবিদ্যালয়ত চিকিৎসাধীন অৱস্থাতে মৃত্যু হৈছিল।
কাজিৰঙাৰ কাঞ্চনজুৰিৰ এনিমেল কৰিডৰত যোৱা ১৭ এপ্ৰিলত কৰ্মৰত অৱস্থাতে পেগুৰ লগতে আন এগৰাকী বনকৰ্মী বাদশ্বাহ আলীক এখন বাহনে মহতিয়াই থৈ গৈছিল।
সাহায্য প্ৰদান অনুষ্ঠানত মন্ত্ৰী অতুল বৰাৰ লগতে বোকাখাতৰ মহকুমাধিপতি বিবেক শ্যাম, কাজিৰঙাৰ সঞ্চালক আকাশদীপ বৰুৱা, ৰাজহ চক্ৰ বিষয়া খনীন্দ্ৰ দাস আৰু WWF-ৰ সমন্বয়ক প্ৰণৱজ্যোতি বৰা উপস্থিত আছিল৷
