চিৰাং জিলাৰ আই নদীৰ পাৰত উদুলি মুদুলি দৈজিং মহোৎসৱৰ মঞ্চত শনিবাৰে এমেৰিকান মল্লযুঁজ শ্ব’ ডব্লিউ ডব্লিউ ইৰ তাৰকা দলীপ সিং ওৰফে গ্ৰে’ট খালিক আদৰণি জনাই মুখ্য মন্ত্ৰী সৰ্বানন্দ সোণোৱালে।
সন্ধিয়া প্ৰায় ৫ বজাত তাৰকাজনে মহোৎসৱস্থলীত নিৰ্মিত বক্সিং ৰিঙৰ পৰা উপস্থিত ৰাইজক সম্বোধন কৰে।
খালিৰ অনুষ্ঠানৰ পিছতে কিছুসময় পিছতে সন্ধিয়া ৫:৩০ বজাৰ পৰা আৰম্ভ হৈছে বলিউদি সংগীত পৰিচালক তথা গায়ক হিমেশ ৰেশমিয়াৰ সংগীতানুষ্ঠান। ৰেশমিয়াৰ অনুষ্ঠান হ’ব ডেৰ ঘণ্টাজোৰা।
হিমেশৰ অনুষ্ঠানৰ পিছতে স্বেতা পণ্ডিত (৭:৩০ বজা), ভূমি ত্ৰিবেদী (৯ বজা) আৰু নীৰজ শ্ৰীধৰৰ বম্বে’ ভাইকিঙে ৰাতি ১০ বজাত সংগীত অনুষ্ঠান পৰিৱেশন কৰিব।
লগতে পঢ়ক– দৈজিং মহোৎসৱৰ বিষয়ে
টি ভি ৰিয়েলিটি শ্ব’ চুপাৰ দান্সাৰ চেপ্তাৰ ২ বিজয়ী যোৰহাটৰ ১২ বছৰীয়া বিশাল শৰ্মাই মহোৎসৱৰ মঞ্চত সন্ধিয়া ৭ বজাত নৃত্য পৰিৱেশন কৰিব।
মহোৎসৱৰ মঞ্চত ধাৰাৱাহিকভাৱে চলি আছে স্থানীয় শিল্পীৰ বিভিন্ন সাংস্কৃতিক অনুষ্ঠানৰ লগতে পৰম্পৰাগত নৃত্য-গীত।
এইবাৰ তৃতীয় বৰ্ষত ভৰি দিয়া অসম পৰ্য্যটন আয়োজিত এই মহোৎসৱখনত ইতিমধ্যে দেশ বিদেশৰ বহু পৰ্য্যটক অহা পৰিলক্ষিত হৈছে। উৎসৱস্থলীত থলুৱা বিভিন্ন পৰম্পৰাগত খাদ্য, বস্ত্ৰ আদিৰ উপৰি পৰ্য্যটকৰ আকৰ্ষণৰ বাবে কেম্প আৱাস, এদভেন্সাৰ স্প’ৰ্টছ আদিৰো ব্যৱস্থা কৰা হৈছে।
অহা ৭ জানুৱাৰিলৈকে চলিব লগা এই মহোৎসৱখনত শুকুৰবাৰে জনপ্ৰিয় গায়ক কে’লাশ খেৰৰ কে’লাশা বেণ্ডে সংগীত পৰিৱেশন কৰিছিল।
