এতিয়াৰ পৰা মহানগৰীত ক’ভিড চিকিৎসা বা ক’ভিডত মৃত্যু হোৱা লোকৰ সৎকাৰৰ ক্ষেত্ৰত সন্মুখীন হোৱা যিকোনো অসুবিধাৰ তৎকালীনভাৱে সমাধান কৰিব জিলা প্ৰশাসনে।
কামৰূপ মহানগৰ উপায়ুক্ত বিশ্বজিৎ পেগুৱে ইয়াৰ বাবে অতিৰিক্ত উপায়ুক্ত (স্বাস্থ্য), যুটীয়া স্বাস্থ্য সেৱা সঞ্চালক, স্বাস্থ্য বিভাগৰ জিলা নিৰীক্ষণ বিষয়া, জিলা দূৰ্যোগ প্ৰশমন প্ৰাধিকৰণৰ প্ৰকল্প বিষয়া, আৰু ৰাষ্ট্ৰীয় স্বাস্থ্য অভিযানৰ জিলা আঁচনি প্ৰৱন্ধক আৰু জিলা মিডিয়া বিশেষজ্ঞকলৈ এটা অভিযোগ নিষ্পত্তি কোষ গঠন কৰিছে৷
মহানগৰবাসীয়ে ট’ল ফ্ৰী ১০৭৭, ০৩৬১-২৭৩৩০৫২ আৰু ৯৩৬৫৪২৩৯১৪ -এই তিনিটা নম্বৰযোগে নিজৰ অভিযোগ দাখিল কৰিব পাৰিব৷
ইয়াৰে তৃতীয় নম্বৰটো Whatsapp নম্বৰ। কেৱল এই নম্বৰকেইটাই নহয়, ১০৪ নম্বৰ বা সামাজিক মাধ্যমৰ প’ষ্টযোগে দিয়া আপত্তিৰো নিষ্পত্তি কৰিব এই অভিযোগ নিষ্পত্তি কোষে৷।
ক’ভিড চিকিৎসা আৰু ক’ভিড ৰোগীৰ সৎকাৰৰ অভিযোগ নিষ্পত্তিৰ ক্ষেত্ৰত এই কোষে প্ৰাধান্য দিব যদিও ক’ভিড সম্পৰ্কীয় যিকোনো অভিযোগ এই কোষে নিষ্পত্তি কৰিব।
এই কোষ ২৪ ঘণ্টাই উপলব্ধ হ’ব আৰু ইয়াৰ কৰ্মচাৰীসকলে দৈনিক তিনিটাকৈ শ্বিফ্টত কাম কৰিব৷
শনিবাৰে এই কোষত নিয়োজিত কৰ্মচাৰীসকলৰ বাবে এক প্ৰশিক্ষণ কাৰ্যসূচী অনুষ্ঠিত হয়৷ অতিৰিক্ত উপায়ুক্ত (স্বাস্থ্য) শৰ্মিষ্ঠা বৰাৰ অধ্যক্ষতাত হোৱা এই কাৰ্যসূচীত অতিৰিক্ত উপায়ুক্ত (টীকাকৰণ) গুণজিৎ ৰয়চৌধুৰী, অতিৰিক্ত আয়ুক্ত, জিলা দুৰ্যোগ প্ৰশমন প্ৰাধিকৰণৰ প্ৰকল্প বিষয়া, ৰাষ্ট্ৰীয় স্বাস্থ্য অভিযানৰ জিলা আঁচনি প্ৰৱন্ধক আৰু জিলা মিডিয়া বিশেষজ্ঞ উপস্থিত থাকে৷
এই কাৰ্যসূচীত ক’ভিড সংক্ৰান্তীয় পৰীক্ষা, টীকাকৰণ, আদি সকলো বিষয়ৰ ওপৰত কৰ্মচাৰীসকলক প্ৰশিক্ষণ দিয়া হয়৷
