বিজেপি চৰকাৰৰ আঁচনিৰ ধনৰ লোভঃ হিতাধিকাৰী হ’বলৈ নিজ ভাতৃৰেই বিয়াত বহিল মহিলা
দেশত এতিয়া হিতাধিকাৰীৰ অবাধ সংখ্যা। ইখনৰ পিছত সিখন আঁচনিৰে দেশবাসীক হিতাধিকাৰী ৰূপে সামৰি লৈছে শাসকীয় চৰকাৰে। এনে হিতাধিকাৰী হোৱাৰ যোজ্ঞতা অৰ্জন কৰিবলৈ উত্তৰ প্ৰদেশৰ এগৰাকী মহিলাই লোৱা আজৱ পন্থাই ব্যাপক চৰ্চা লাভ কৰিছে।
উত্তৰ প্ৰদেশৰ শাসকীয় বিজেপি চৰকাৰে গ্ৰহণ কৰিছিল এখন বিশেষ আঁচনি। এই মুখ্যমন্ত্ৰীৰ গণ বিবাহ আঁচনিৰ অধীনত হিতাধিকাৰীয়ে লাভ কৰে ৫১ হাজাৰ টকা। এই আঁচনিৰ সুবিধা লাভৰ বাবে মহিলাগৰাকীয়ে প্ৰৱঞ্চনামূলকভাৱে গ্ৰহণ কৰে এক আজৱ পন্থা।
প্ৰকাশিত খবৰ অনুসৰি, যোৱা ৫ মাৰ্চত মহাৰাজগঞ্জত আয়োজন কৰা হৈছিল এক গণ বিবাহ অনুষ্ঠান। এই অনুষ্ঠানতে বিয়াৰ বাবে সাজু হৈছিল প্ৰীতি যাদৱ নামৰ মহিলাগৰাকী। কিন্তু সময়মতে সভাস্থলীত উপস্থিত হ’ব নোৱাৰিলে তেওঁৰ দৰা ৰমেশ যাদৱ।
তেনে পৰিস্থিতিত একাংশ মধ্যভোগীয়ে মহিলাগৰাকীক তেওঁৰ নিজ ভাতৃ কৃষ্ণ যাদৱৰ সৈতেই বিয়াত বহাৰ মন্ত্ৰণা দিয়ে। এই মন্ত্ৰণা অনুসৰিয়ে নিজ ভাতৃৰ সৈতে বিয়াত বহে মহিলাগৰাকী। ইয়াৰ পাছতে তেওঁলোকে হিতাধিকাৰীক দিয়া ধন লাভৰ উদ্দেশ্যে গণ বিবাহ আঁচনিৰ বাবে পঞ্জীয়ন কৰিছিল।
ইয়াৰ পিছতে পোহৰলৈ আহে এই প্ৰৱঞ্চনা। লগে লগে দুই ভাতৃ-ভগ্নীৰ বিৰুদ্ধে গোচৰ ৰুজু কৰাৰ লগতে তদন্তৰ নিৰ্দেশ দিয়া হয়। অনুষ্ঠানৰ পূৰ্বে তেওঁলোকৰ নথি-পত্ৰ পৰীক্ষা কৰা এজন গাঁও উন্নয়ন বিষয়াকো ষাস্তিমূলক ব্যৱস্থা হিচাপে নিলম্বন কৰা হৈছে।
উল্লেখ্য যে, এই আঁচনিৰ অধীনত বিয়া হোৱা দম্পতীক ৫১ হাজাৰ টকা দিয়া হয়। ৩৫,০০০ টকা কইনাৰ বেংক একাউণ্টলৈ প্ৰেৰণ কৰা হয় আৰু দম্পতীহাললৈ উপহাৰ কিনাৰ বাবে ১০,০০০ টকা দিয়া হয় আৰু অনুষ্ঠানৰ ব্যৱস্থা কৰাৰ বাবে ৬,০০০ টকা ধাৰ্য কৰা হয়।