দুখন বিজেপি চৰকাৰ : গুজৰাটত ৬৫০ কোটি টকাৰ বিদ্যুৎ বিল ৰেহাইৰ বিপৰীতে অসমত ৫ শতাংশ বৃদ্ধি

অলপতে হৈ যোৱা বিধানসভাৰ নিৰ্বাচনৰ জৰিয়তে কংগ্ৰেছে শাসনলৈ অহা তিনিখন ৰাজ্যত কৃষি ঋণ মাফ দিয়াত সচকিত হৈ পৰা বিজেপিয়ে নিজৰ শাসনত থকা ৰাজ্যবোৰতো অনুৰূপ কিছুমান আঁচনি ল’বলৈ বাধ্য হৈ গৈছে। তাৰেই উদাহৰণস্বৰূপে দলটোৰ দ্বাৰা শাসিত গুজৰাটত গ্ৰামাঞ্চলত বিদ্যুৎ বিল মাফৰ আঁচনি লৈছে ৰাজ্য চৰকাৰে।

ৰাজ্যকেইখনত কংগ্ৰেছৰ বৃহৎ পৰিমাণৰ কৃষি ঋণ মাফৰ ঘোষণাৰ পিছদিনাই গুজৰাট বিজেপি চৰকাৰে এই আঁচনি ঘোষণা কৰে। গুজৰাট ৰাজ্য চৰকাৰখনে ১৮ ডিচেম্বৰত মুঠ ৬৫০ কোটি টকাৰ বিদ্যুৎ বিল ৰেহাইৰ কথা ঘোষণা কৰে, যিটো আছিল ৰাজস্থান, মধ্য প্ৰদেশ আৰু ছট্টিছগড়ৰ চৰকাৰে কৃষি ঋণ মাফ দিয়াৰ ঠিক পিছৰে অগ্ৰগতি।

অসমৰ বিজেপি চৰকাৰখনেও যোৱা ১৭ ডিচেম্বৰত হোৱা এখন কেবিনেট বৈঠকত কে চি চি ঋণ সুদ শূন্য কৰাৰ কথা ঘোষণা কৰে।

কিন্তু গুজৰাট চৰকাৰে গ্ৰাম্যাঞ্চলৰ গ্ৰাহকৰ বিদ্যুৎ বিল ৰেহাই দিয়াৰ বিপৰীতে অসমৰ বিজেপি চৰকাৰখনে বিধেয়কৰ জৰিয়তে ৫ শতাংশ এই বিল বৃদ্ধি কৰাটো ইতিমধ্যে নিশ্চিত কৰিছে। যোৱা ছেপ্টম্বৰ মাহতেই বিধানসভাত Assam Electricity Duty (Amendment) Bill, 2018 নামৰ উক্ত বিধেয়কখন গৃহীত কৰিছে অসম চৰকাৰে। কংগ্ৰেছে এই বিধেয়কখনৰ বিৰোধিতা কৰিছিল যদিও শাসক দলৰ বিধায়কৰ সমৰ্থনত ইয়াক গৃহীত কৰা হয়।

তাতকৈ গুৰুত্বপূৰ্ণ কথা যে বিদ্যুতৰ বৃহৎ নাটনি থকা গুজৰাটৰ বিজেপি চৰকাৰে অসমতকৈ বহু কম মূল্যত বিদ্যুৎ যোগান ধৰে গ্ৰাহকক। অসমত সাধাৰণ আৰু মধ্যমীয়া পৰিমাণৰ ব্যৱহাৰকাৰীৰ বাবে প্ৰতি য়ুনিটৰ দাম ৬ৰ পৰা ৭ টকা হোৱাৰ বিপৰীতে একেই পৰিমাণৰ য়ুনিটৰ বাবে গুজৰাটত দিব লাগে ৪ ৰ পৰা ৫ টকা।

উল্লেখযোগ্য যে বিধেয়কখনৰ সমৰ্থনত ক’বলৈ গৈ মন্ত্ৰী হিমন্তই বিদ্যুৎ বিল বৃদ্ধিৰ সপক্ষে যুক্তি দিয়াৰ লগতে গ্ৰাহকসকলক ঘৰুৱা খৰচ কমাবলৈ অদ্ভুত পৰামৰ্শ দিয়ে।